कांग्रेस व एमालेय् माओवादीया कार्ड

थःपिनि नेतृत्वय् सरकार गठन याये फइगु सम्भावना मदयेवं माओवादीं निगूगु व स्वंगूगु तःधंगु पार्टी खयां नं सरकार दयेकेगु धकाः कस्से जुयाच्वंगु कांग्रेस व एमाले दुने विग्रहया कार्ड वांछ्वया बिउगु दु। एमालेय् जूसा झलनाथ खनाल व कांग्रेसय् जूसा शेरबहादुर देउवायात प्रधानमन्त्रीया रुपय् थःपिंसं समर्थन यायेफु धइगु माओवादीया 'धापू' पिहां वयेवं निगुलिं पार्टी दुने आः प्रधानमन्त्री जुइम्ह सु धइगु खँय् धेंधेंबल्लाः शुरु जूगु दु। थुकिं यानाः कांग्रेस व एमालेया पुलांगु गठबन्धन कायम यानाः थुपालय् कांग्रेसयात प्रधानमन्त्री दयेकेमाः धयाच्वंपिं एमाले नेतातय्त मछिनीगु अवस्था पिहां वःगु दु। छाय्धाःसां थःगु पार्टीया प्रधानमन्त्री जुइगु प्रत्यक्ष सम्भावना खने दयेक दयेकं नं कांग्रेसयात समर्थन यायेगु बिचाःयात एमाले कार्यकर्तातय्सं समर्थन याइगु खनेमदु। उखे कांग्रेसय् नं एमालें आः तक थःपिंत समर्थन याःगु मखुनि। देउवा जूसा माओवादीं समर्थन याये धायेधुंकूगुलिं आः देउवायात हे न्ह्यःने तयाः जूसां सरकार कब्जा याये माली धाइपिं अप्वया वइगु सम्भावना दु। तर कांग्रेसं माओवादीया जक समर्थक कयाः, व नं देउवायात प्रधानमन्त्री दयेकेगु ज्या याइगु सम्भावना पटक्क हे मदु। उखे एमालेय् धाःसा कांग्रेसया साथ कयाः माधव नेपाल प्रधानमन्त्री जुल, आः माओवादीया साथ कयाः झलनाथयात प्रधानमन्त्री दयेकाः सत्तायात सदां थःगु हे ल्हातय् लाका तयेगु छगू बांलाःगु अवसर प्राप्त जुयाच्वंगु दु। खतुं माओवादीं थ्व कार्ड वांछ्वःगु हे एमाले दुने थज्याःगु हे कचवं पिकायेत खः। थ्व कचवनं एमालेय् विभाजन जुल व छुं जुयाः पार्टी कुचा जुया वन धाःसा उकिया लबः काइम्ह माओवादी हे खः ।

More Stories Like this