गणेद्यः चाःहिलाः पर्यटन वर्ष

शीला

देय्या राजनैतिक अवस्थाया बारे ला सकस्यां सिउगु हे खँ खः। तर राजनीतिया थ्व गन्जागोलयात त्वःताः देय्या सकस्यां नये दयेमा धकाः कामना याना जुइपिं नेपाःमित नं थन हे दनि। थुपिं मध्ये हे छगू पुचः ह्यूमत खोल्चापाखाया "न्हू ड्राइभर पुचः" नं खः ।

खय्त ला थ्व थःगु हे ड्राइभिङ्ग पुचःया हक, हित व अधिकार सुनिश्चित यायेत २०५६ बैशाख ३ गते नीस्वंगु छगू बिस्कं पुचः खः। "थः भिंसा जगत भिं" धाइ थें नां ड्राइभर पुचः खःसां ६० म्ह दुजः दुगु थुगु पुचलं ड्राइभरतय्गु लागिं जक ज्या यानाच्वंगु धाःसा मदु। थ्वं थःगु त्वाःबाहाया निंति नं थीथी कथं ज्या याना वयाच्वंगु दु। त्वाःया यचुपिचु व विशेष यानाः यँयाःबलय् उपाकू वइपिंत लः त्वंकेगु, लँय् जुइपिंत सुविधा बीगु, स्वास्थ्य सेवा बीगु, समय्द्वँ छायाः थीथी ज्याझ्वः याना वयाच्वंगु दु।
थुगुसी थ्व पुचलं छगू न्हूगु ज्या नं यायेत्यंगु दु। सरकारं घोषणा यानातःगु पर्यटन वर्ष २०११ यात सफल यायेत जनस्तरपाखें ज्या यायेगु। उकियात हे ध्यानय् तयाः आः वइगु जनवरी १ तारिखय् पर्यटन वर्ष शुरु जुइ कुन्हु पर्यटन वर्षया गणेशायनमः यायेत स्वनिगःया थीथी गणेद्यः चाःहिलेगु ज्याझ्वः दयेकूगु दु। झी नेपाःमितय् न्ह्यागु ज्या नं गणेद्यः पुज्यानाः जक न्ह्याकेगु परम्परा दु। पर्यटन वर्ष नं गणेद्यः चाःहिलाः हे शुरु जुइमा धकाः वय्कःपिसं स्वनिगः दुने लाःगु खुम्ह गणेद्यः सीकः वनेगु ज्याझ्वः यायेत्यंगु दु। झी नेवाःतय् द्यः सीकः वनेगु धकाः चाःहिलेगु नं छगू कथंया आन्तरिक धार्मिक पर्यटन हे खः ।

वय्कःपिनि ज्याझ्वः कथं जनवरी १ कुन्हु दकलय् न्हापां मरुया अशोक विनायकय् पुज्यानाः यात्रा न्ह्याकी। वयां लिपा चाबहीया चन्द्र विनायक, ख्वपया कमल विनायक, सूर्य विनायक, खोनाया कार्य विनायक व चोभाःया जल विनायकय् पुजा जुइ। थुगु यात्राया नारा नं "विनायक दर्शन, धार्मिक पर्यटन प्रवर्धन" धकाः तयातःगु दु। यात्रा चाहिं येँया ह्यूमत त्वालय् मुनाः शुरु जुइ ।

वि.सं २०६१ साल पुस १७ गते नं थ्व पुचलं बाराही दर्शन धकाः छन्हुं हे निलबाराही, धुम्बाराही, रक्त बाराही, बज्रबाराही, धनमती बाराही व थिमिया निलबाराही चाःहिउगु खः। उगु यात्रायात वय्कःपिसं तिर्थ यात्राया रूपय् जक सीमित मयासे उगु इलय् देशय् जुयाच्वंगु भद्रगोल, हड्ताल, आन्दोलन बन्द जुयाः देशय् याकनं शान्ति कायम जुइमा धइगु कामना यासें यात्रा न्ह्याकूगु खः। उगु यात्राय् झिंनिसःम्ह भक्तजनतय्सं ब्वति काःगु खःसा उमित तःग्वःगु झिंन्यागः बसय् तयाः चाःहीकूगु खः। यात्रा लिपा थःगु हे त्वालय् भ्वय् नकाः सकसितं विदा बियाछ्वत। उगु यात्राय् म्हतिं १६० तकाया टिकट मियागु खःसां थःपिं धाःसा द्याःगु खँ वय्कःपिंसं कनादिल ।

खतुं थज्याःगु धार्मिक यात्रा थुगु पुचलं थ्व स्वयां न्हापा नं तःक्वःमछि हे यायेधुंकूगु दु। गथे कि २०४२ साल पौष २० गते च्याम्ह भैरव, २०४७ पुस १३ गते प्यम्ह भैरब, २०५१ पुस ६ गते प्यम्ह योगिनी, २०५६ पुस १७ गते प्यम्ह महालक्ष्मी दर्शन यात्रा न्ह्याकूगु खः ।

न्हू ड्राइभर पुचःया उद्देश्य धइगु थःगु समाज सुधार यायेगु खः। उकिया निंति मिस्त हे न्ह्यज्यायेमाः धइगु वय्कःपिनि धापू दु। उकिं छेँज्याय् जक तक्यनाच्वंपिं मिस्तय्त छेँनं पित हयेगु लागिं इमित यःगु लागा कथं धर्म व संस्कृतिपाखे सालेगु कुतः यानाच्वनागु खँ नं वय्कःपिंसं कनादी। लिच्वः कथं मिसात यक्व हे उत्साहित जूगु खनेदुसा आः जुइत्यंगु गणेश यात्रा नं मिसापिनि हे आह्वानय् न्ह्याकेत्यंगु खः ।

न्हापांगु तीर्थयात्रा मुंकूबलय् न्हय्सः दर्शनार्थी दुगु खः। लिपा योगिनी यात्रा जूबलय् १२०० म्ह थ्यन। आः गणेश यात्राय् १५०० म्ह दइगु अनुमान दु। आयोजक पुचः येँया ह्यूमत त्वाःयापिं खःसां थ्वं याइगु ज्याझ्वलय् धाःसा यल ख्वप, किपू, पांगा, बुंग, सतुंगः लगायतया मनूतय्सं ब्वति काः वयाच्वंगु दु। मसिउगु थाय् सीकेगु, द्यःया दर्शन यानाः मनय् आनन्द प्राप्त यायेगु नापं देय्या आन्तरिक पर्यटन प्रवर्धन यायेगु थ्व यात्राया उद्देश्य जुयाच्वंगु दु।
यात्राया झ्वलय् आवश्यक जुइगु लः, वासः व भ्वय्या व्यवस्थापन नं थ्वहे पुचलं यानाच्वंगु दु। आः जुइत्यंगु श्री गणेश दर्शन यात्राया निंतिं टिकटया मू प्यसः तका तयातःगु दु ।

घोषित पर्यटन वर्ष ज्याझ्वः ताःलाकेत थःपिंसं थ्व दँन्यंक हे थीथी कथंया आन्तरिक पर्यटन सम्बन्धी ज्याझ्वःत यायेगु ताः तयातःगु दु ।

More Stories Like this