'शान्ति व संविधान अलपत्रय् लाकेगु षडयन्त्र'

तत्काल हे संसदया नियमित अधिवेशन सःतेत माओवादीपाखें माग

येँ (सन्ध्या टाइम्स)/एकीकृत माओवादीं आःया अवस्थाय् वर्तमान सरकारं शान्ति व संविधानयात अलपत्रय् लाकेगु षडयन्त्र याःगु द्वपं बिउगु दु ।

थौं सुथय् पार्टीया अध्यक्ष प्रचण्डया छेँ नयाँबजारय् जूगु स्थायी समितिया बैठकं उगु कथं सरकारयात द्वपं बिउगु खः ।

सरकार गठनबारे ठोस सहमति मजुइकं व्यवस्थापिका संसदया नियमित अधिवेशन मसःतेगु सत्तारुढ दलया नेतातय्गु निर्णययात कयाः थौं च्वंगु स्थायी समितिया बैठकं अथे द्वपं बिउगु खः ।

एकीकृत माओवादीं सत्तारुढ दलतय्गु उगु निर्णययात 'सहमतिया अःखः' नापं 'झंगः लाःगु'या संज्ञा नं बिउगु दु। माओवादीं स्वंगू दलया दथुइ जूगु सहमति कथं याकनं हे संसदया नियमित अधिवेशन सःतेत नं माग याःगु दु।
थौं सुथय् उगु बैठक क्वचाये धुंकाः संचारकर्मीतलिसे खँ ल्हासें माओवादीया प्रवक्ता दीनानाथ शर्मां अथे जानकारी बियादीगु खः। वय्कलं सहमति पालना मयासे सरकारं शान्ति व संविधानयात अलपत्रय् लाकेत्यंगु निष्कर्ष बैठकं पिकाःगु दु धकाः नं धयादिल ।

सरकार व सत्तारुढ दलत आःया अवस्थाय् जनताया भावनाया अःखः मुलुकयात अस्थिरता व द्वन्द्वपाखे घ्वाना छ्वयेगु कुतः यानाच्वंगु माओवादीया दावी खः।
व्यवस्थापिका संसदया अधिवेशन सःतेगु ज्या लिबाकाच्वंगुया मू कारण धइगु हे कामचलाउ सरकारयात हे ल्यंका तयेगु षडयन्त्र खः धयादिसें माओवादीया प्रवक्ता शर्मां धयादिल 'सहमतिया अःखः सत्तारुढ दलतय्गु ज्यायात कयाः थौं च्वनीगु स्वंगू दलया बैठकय् थःपिंसं खँ तयेगु जुइ ।'

वंगु विहिवाः एकीकृत माओवादी, नेपाली कांग्रेस व एमालेया शीर्ष नेतातय्गु दथुइ माओवादी नापं मेमेगु दलं विशेष अधिवेशनय् तःगु प्रस्ताव लित कायेगु, सरकारं याकनं हे नियमित अधिवेशन सःतेगु धकाः सहमति जूगु खः ।

तर सत्तारुढ दलया नेतातय्गु म्हिगः प्रधानमन्त्री निवासय् च्वंगु बैठकं स्वंगू दलया नेतातय् दथुइ प्याकेजय् सहमति मजुइकं व्यवस्थापिका संसदया अधिवेशन सःतेगुया अर्थ मदु धकाः ठहर यानाः न्हापां प्याकेजय् सहमति यायेमाः अनं लिपा जक संसदया नियमित अधिवेशन सःतेमाः धकाः प्रधानमन्त्रीयात सुझाव बिउगु खः ।

थ्वया हे दथुइ स्वंगू दलया शीर्ष नेतातय् दथुइ न्हूगु संविधान निर्माण, राजनीतिक गतिरोध अन्त्य नापं न्हूगु सरकार गठनया विषययात कयाः थौं बैठक च्वनीगु जूगु दु ।