कंसाकारयात पूर्वाग्रही कारवाही

विकास निर्माण थेंज्याःगु ख्यलय् तकं नेपालय् गुलि घच्चायापुगु राजनीति जुइयः धइगु खँया मेगु छगू नमूना पिहां वःगु दु,नेपाल वायुसेवा निगमया लागिं विमान न्यायेगु धकाः कुतः याःम्ह अनया कार्यकारी अध्यक्ष सुगतरत्न कंसाकारयात भ्रष्टाचारया द्वपनय् अख्तियारपाखें तःगु मुद्दा। सरकारं निगमया लागिं विमान न्यायेगु धकाः याःगु निर्णय कथं हे एअरबस कम्पनीलिसे विमान न्यायेत बैना छ्वःगु अनियमित ज्या जुल धासें अख्तियारं कंसाकार विरुद्ध मुद्दा तयेगु धकाः निर्णय याःगु खः। सरकारं विमान न्यायेगु धकाः निर्णय याः कथं विमान न्यायेत बैना छ्वयेगु हे यदि भ्रष्टाचार खःसा विमान न्यायेत यायेमाःगु नियमित प्रक्रिया चाहिं छु खः ले? अख्तियारपाखें याःगु थ्व निर्णय अतिकं पूर्वाग्रही जक खने दुगु मखु थुकिया लिउने नेपाल वायु सेवा निगमयात विकास हे याके मबिसे धरासायी याना छ्वयेगु विकास विरोधीतय्गु तःधंगु षडयन्त्र नं सुलाच्वंगु खनेदु। अख्तियार, संसदया सार्वजनिक लेखा समिति थेंज्याःगु निकायतय्सं सुयागु इशाराय् सुयागु दां नयाः थज्याःगु पलाः छिउगु खः, व बरु छानबिन यायेमाःगु विषय जुयाच्वंगु दु। नेपाल टेलिकमयात नेपाःया १ नम्बर करदाता जुइगु स्तरय् थ्यंकूम्ह राष्ट्रसेवक कंसाकार थेंज्याःम्ह मनूयात सिरपाःया पलेसा भ्रष्टाचारया मुद्दा चले यायेगु धइगु थ्व देशय् आः सुनां नं भिंगु ज्या धइगु मयाःसां जिल धाःगु खः। सरकारं विमान न्यायेगु मखुत धकाः थःगु निर्णय लित काःगु मदुनि, तर विमान न्याइपिंत धाःसा भ्रष्टाचारया द्वपं बिया कारवाही यानाच्वंगु दु। वास्तवय् थ्व देशय् थ्व फुक्कं ग्राय्ण्ड डिजायन सुनां व सुयागु लागिं यानाच्वन खः, थ्व आः बिचाः यायेमाःगु हे विषय जूगु दु ।

More Stories Like this