सहमति लिपा जक अधिवेशन

अनमिनया म्याद थप यायेगु जुइमखु : सरकारवादी दलत
येँ (झीगु स्वनिगः)

वर्तमान कामचलाउ सरकारय् दुथ्याःगु दलतय्सं न्हूगु सरकार गठन शान्ति प्रकृया व संविधान निर्माणया बारे दलतय्गु दथुइ सहमति जुइ धुंकाः जक व्यवस्थापिका संसदया नियमित अधिवेशन सःतेगु जुइ धकाः निर्णय याःगु दु । प्रधानमन्त्री निवास वालुवाटारय् शनिवाः म्हिगः च्वंगु सरकरय् दुथ्याःगु दलतय्गु मुँज्यां मूमू विषयसं सहमति जुइ धुंकाः जक मुँज्या सःतेगु धकाः निर्णय याःगु खः । उगु मुँज्याय् गबले तक सहमति ब्वलनी मखु अबले तक नियमित अधिवेशन मसःतेगु धकाः सहमति जूगु खः धकाः छम्ह नेतां धयादीगु दु । वर्तमान कामचलाउ सरकारय् दुथ्याःगु नेकपा संयुक्तया नायः चन्द्रदेव जोशीं संचारकर्मीतलिसे खँल्हासें धयादिल आःया हे अवस्थाय् अधिवेशन सःतेगुया औचित्य मदु दलतय्गु दथुइ सहमति मजुइकं अधिवेशन सःतल धाःसा न्हापा थें हे न्ह्याक्व हे चुनाव याःसां प्रधानमन्त्री ल्यये फैगु अवस्था मदु उकि सरकार मदयेकेगु अवस्था वयेमजिउ धैगु जिमिगु निष्कर्ष खः । उगु मुँज्याय् शान्ति प्रकि्रयाया निति भूमिका म्हिता वयाच्वंगु संयुक्त राष्ट्रसंघीय मिसन अनमिनया म्याद थप मयायेगु धकाः नं खँ क्वःछ्यूगु दु ।

अनमिनयात लितछ्वयाः सेना समायोजन विशेष समितियात हे कि्रयाशिल यायेगु धकाः नं खँ क्वःछ्यूगु दु । अनमिनया म्याद थप यायेमाः धकाः संविधानसभाया दक्ले तःधंगु दल एकीकृत माओवादीं धयाः वयाच्वंगु दु । वंगु विहिवार एकीकृत माओवादी नेपाली कांग्रेस व एमालेया दथुइ संसदया विषेश अधिवेशन अन्त्य यायेगु अले छवाःया दुने व्यवस्थापिका संसदीय नियमित अधिवेशन सरकारपाखें सःतके बिइगु धकाः सहमति जूगु खः । आः वयाः सरकारवादी दलतय्गु दथुइ सहमति मजुइकं संसदया नियमित अधिवेशन सःतेगु जुइमखु धकाः गुगु कथं खँ क्वछित उकियाना सरकारवादी दलतय्गु नियतप्रति मनूतय्सं शंका यानाहःगु दु ।