बान्हु बन्दया आंशिक लिच्वः
सलंसःम्ह बन्द आह्वानकर्ता ज्वन / १२ बजे लिपा बन्द चाल
येँ (सन्ध्या टाइम्स)/सत्तारुढ पार्टी एमालेया भ्रातृ संगठन अनेरास्ववियूपाखें थौं घोषणा यानातःगु बान्हुया स्वनिगः बन्दं जनजीवन आंशिक रुपं प्रभावित जुल ।
बन्द आह्वान यानाः थाय् थासय् प्रदर्शन यायेगु झ्वलय् सलंसः विद्यार्थी कार्यकर्तात प्रहरीं ज्वना यंकूगु खँ एमाले अखिलया महासचिव किशोर विक्रम मल्लं कनादीगु दु।
वय्कलं वानेश्वर लागां ४० म्ह, प्रदर्शनीमार्ग लागां २५ म्ह, त्रिचन्द्र कलेजं २० म्ह, कालिमाटी लागां २५ म्ह, शंकरदेव क्याम्पसं ५ म्ह, पिपल्स क्याम्पसं १५ म्ह, ग्वंगःबुँ लागां १० म्ह, बालाजु लागां १५ म्ह, ख्वपं ५ म्ह व किपुलिं १५ म्ह नापं थाय् थासं विद्यार्थीतय्त ज्वना यंकूगु जानकारी बियादिल ।
प्रदर्शनया झ्वलय् प्रहरीं थाय्थासय् हस्तक्षेप यानाः अखिलया केन्द्रीय सचिव सरोज यादव, केन्द्रीय दुजःपिं राजकुमार राई, राधिका खतिवडा नापं मेपिं दुजःतय्त नं ज्वना यंकूगु खँ धाःगु दु।त्रिचन्द्र कलेजय् ल्वापु जूगु इलय् थः कार्यकर्तायात खुकुरीं पालाः घाःपाः याना बिउम्ह नेपाल विद्यार्थी संघया कार्यकर्तायात ज्वनाः कारवाही यायेमाःगु माग यासें एमाले अखिलं थौं थ्व बन्द आह्वान याःगु खः। बन्दया झ्वलय् थौं सुथय् ६ बजे तक बांलाक हे यातायात संचालन जूगु खःसां अनं लिपा विद्यार्थीतय्सं थःथःगु क्याम्पस लागाय् विरोध प्रदर्शन शुरु याना हःगु खः।
बन्द आह्वान याःगुलिं सुथय् ६ बजे लिपा सार्वजनिक सवारी साधन रुटय् चले जुइगु बन्द जूगु खःसां निजी सवारी साधन नापं आपालं मोटरसाइकल धाःसा चले जूगु खनेदु ।
प्रदर्शनकारीत दुगु लागाय् धाःसा ब्यापक रुपं प्रहरी परिचालन यानातःगु दुसा उज्वःगु लागाय् यातायात नं बांलाक संचालन जुयाच्वंगु मदु। गुलिखे रुटय् फाट्टफुट्ट रुटया गाडी नं चले जुयाच्वंगु खनेदु ।
अखिलं थौं न्हिच्छिं हे बन्दया घोषणा यानातःगु खःसां आपालं विद्यार्थीतय् परिक्षा लानाच्वंगु नापं क्रिशमस-ईभया ई नं जूगुलिं म्हिगः हे न्हिनय् १२ बजे तक जक बन्द यायेगु धकाः ज्याझ्वः संशोधन याःगु खः। तर थ्व बन्द सांकेतिक विरोध जक खः धासें महासचिव मल्लं दोषीयात ज्वनाः कारवाही मयात धाःसा अझ सशक्त ढंगया आन्दोलन यायेगु जुइ धकाः ख्याच्वः बिउगु दु। वय्कलं बान्हुया बन्द धाःसा शान्तिपूर्ण रुपं सफल जूगु दावी नं यानादिल ।
बन्द ज्याझ्वः ताःलाकेत एमाले अखिलं म्हिगः येँय् आरआर क्याम्पसंनिसें मसाल जुलुस नं पिकाःगु खः ।
