रियल जुसय् छापा व भारतीय दूतावास

नेपाःया बजारय् विवादास्पद जुयाच्वंगु डाबर नेपालया उत्पादन रियल जुस वास्तवय् त्वने हे मजिउगु पेय पदार्थ जुयाच्वन धइगु खँ अन नकतिनि जूगु छापापाखें पुष्टि जूगु दु। आः नकतिनि अख्तियारपाखें उगु कम्पनीया गोदामय् छापा मारे याःबलय् अन न्हूगु मिति तयेत ठिक्क यानातःगु पुलांगु जुसत आपालं लुया वःगु खः। पुलांगु जुस फुकलीसं अख्तियारं शिल तयाः अलग तया थकूगु खःसां डाबर नेपालं लिपा चांचां हे अज्याःगु जुस गायब यानाः नेपाःया ऐन कानूनयात समेत हाथ्या बिउगु दु ।

छुं ई न्ह्यवंनिसें नेपाःया बजारय् मिया तःगु रियल जुसय् थीथी कथंया फोहोर पदार्थ पिहां वयाच्वन धकाः बय्बय् जुयाच्वंगु खः। पत्रपत्रिकाय् बय्बय् जूगु उगु खँयात कयाः स्वय्म नेपाःया निंतिं भारतीय राजदूतं समेत न्ववाना हयेवं थ्व विवादं मेगु मोड काःगु खः। तर आः अख्तियारपाखें याःगु छापाय् हे कार्टुन का कार्टुन पुलांगु जुस भण्डारण यानातःगु लुया वयेवं थ्व कम्पनीपाखें नये मजिउगु ज्वलं तकं बजारय् पित बियाच्वंगु खः धइगु खँ पुष्टि हे जुल। थुकिया निंतिं डाबर नेपाल कारवाहीया भागिदार जुइगु निश्चित हे दु। अख्तियारया छापापाखें गुगु लिच्वः पिकाःगु खः उकियात कयाः भारतीय दूतावासं छुं न्ववाःगु मदुनि। अथे खःसां डाबर नेपालं शिल तयातःगु पुलांगु जुस चांचां बेपत्ता यायेगु गुगु ज्या जुल, वयात अथे यायेगु लागिं हःपाः बीगु ज्याय् धाःसा भारतीय दूतावासया ल्हाः मदु धाये फइ मखु। नेपालय् गैरकानुनी ज्या यानाच्वंपिं मनू वा संस्थायात अःखतं हःपाः बीगु ज्याय् कुटनीतिक मर्यादायात हाचांगायाः दूतावास सक्रिय जुल धाःसा वयात पनेगु ज्या नं सरकारं याये हे माः ।

More Stories Like this