प्रम चुनाव अझं अन्यौल तिनि
रामचन्द्र पौडेलया उम्मेदवारी जारी हे जुयाच्वनीगु सम्भावना
येँ (सन्ध्या टाइम्स)/आः देशय् न्हूम्ह प्रधानमन्त्री सु जुइ धइगु खँय् राजनीतिक पार्टीतय् दथुइ थीथी कथंया समीकरणत बने जुयाच्वंसां यदि कांग्रेसया रामचन्द्र पौडेलं उम्मेदवारी लित मकाल धाःसा प्रम ल्ययेगु ज्या हे गुकथं जुइ धइगु खँय् अन्यौल दनिगु खँ विज्ञ सूत्रं धाःगु दु ।
प्रधानमन्त्री चुनावया आः जुयाच्वंगु अविछिन्न प्रक्रिया रोके यायेगु लागिं नियमावली संशोधन यायेत माओवादीं सःतूगु विशेष अधिवेशन चले याकेगु लाकि मयायेगु धकाः थौं मतदान जुइत्यंगु दु। छुं जुयाः मतदानपाखें विशेष अधिवेशन न्ह्यात व चुनाव प्रक्रिया सम्बन्धी नियमावली संशोधन जुल धाःसा रामचन्द्र पौडेलया उम्मेदवारी खारेज जुयाः न्हूगु चुनाव याये फइगु वातावरण बने जुइ। अथे मजुसे विशेष अधिवेशन सःतेगु आह्वान खारेज जुल धाःसा प्रम चुनाव नियमावली संशोधन जुइ मखु व वयां लिपा हानं पुलांगु हे चुनाव प्रक्रिया शुरु जुयाः पौडेलया उम्मेदवारी जारी तुं जुयाच्वनीगु खँ नं सूत्रं धाःगु दु ।
छुं जुयाः पौडेलया उम्मेदवारी जारी हे जुयाच्वन धाःसा एमालें वय्कःया विरुद्ध हे भोट बिउसां वय्कः पराजित जुल धकाः घोषणा याये मछिनीगु खँ धाःगु दु। चुनावय् पौडेलयात १६ पटक तक अल्पमत वलं नं वय्कःया उम्मेदवारी खारेज मजूसा आः जक गय् खारेज जुइ धइगु खँ नं पिहां वयाच्वंगु दु ।
चुनाव प्रक्रिया हे निश्चित मजूगु कारणं प्रधानमन्त्री ल्ययेगु लागिं जुयाच्वंगु पार्टीतय् कुतलं नं गति काये फयाच्वंगु मदुनि ।
