अनमिनया म्याद बारे पुनर्विचार

नेपाः त्वःताः पिहां वनेगु तयारी यानाच्वंगु राष्ट्र संघीय मिसन अनमिनया म्याद हानं थपे यायेगु खः लाकि मखु धइगु विषयय् पुनः विवाद पिहां वःगु दु। माओवादीपाखें सेना समायोजन यायेगु ज्या क्वमचाःतले अनमिनयात ज्या याका हे तयेमाली धइगु न्हूगु प्रस्ताव तयेवं थुकिया विवाद हानं शुरु जूगु खः। खास यानाः सेना समायोजन यायेगु ज्या सहज यायेत अनमिनं कुतः यानाच्वंगु खः। तर अनमिनया कुतःया वावजूद नं सेना समाजोजनया ज्या धाःसा सफल जुयाच्वंगु मदुनि। आः अनमिन लिहां वनेधुंकाः थ्व ज्या गय् यानाः सफल जुइगु खः धइगु अन्यौल कायम हे दु। राजनीतिक पार्टीतय्सं अनमिन मदयेधुंकाः शान्ति प्रक्रियायात गय् यानाः ताःलाकेगु धइगु रोडम्याप आः तक पेश याःगु मदुनि। सेना समायोजन सम्बन्धी विशेष समितिं अनमिन मदुसां नं थःपिंसं शान्ति प्रक्रिया पूवंकेगु जुइ धायेगु याःसां गय् यानाः पूवंकेगु खः, व धाःसा धाःगु मदुनि। उकिं विशेष समितिपाखें थ्व ज्या पू हे वंकी धइगु ग्यारेन्टी मदु। छुं जुयाः सेना समायोजनया ज्या पूमवन धाःसा उकिया न्हापांगु लिच्वः लाइगु माओवादीयात खः। छाय्धाःसां याकनं समायोजन मजुल वा चित्त बुझे जुइक समायोजन मजुल धाःसा लडाकुपाखें माओवादीयात दवाव वयेफु। कन्हय् माओवादीं नं थः सेनायात कःघाये मफुत धाःसा उकिं माओवादी जक मखु मुक्कं देशय् हे अराजकता ब्वलंकीगु खँय् नं ध्यान बीमाः। कन्हय् अज्याःगु अवस्था मवयेमा धकाः नं माओवादीपाखें अनमिन न्ह्यःने तयाः जूसां सेना समायोजनया ज्या पूवंके धकाः आग्रह यानाच्वंगु जुइफु। उकिं अनमिनया म्याद थप यायेगु वा मयायेगु धइगु खँय् पुनर्विचार जूसा कन्हय्या लागिं बांलाइ ।

More Stories Like this