एमाले अखिल व नेविसंघया दथुइ ल्वापु ब्यागलं ब्यागलं आन्दोलनया ख्याच्वः

येँ (झीगु स्वनिगः)

वर्तमान कामचलाउ सरकारय् दुथ्याःगु थीथी दलत मध्ये दक्ले ततःधंगु निगू दलया विद्यार्थी संगठनया दथुइ तःन्हु न्ह्यःनिसें जुयाच्वंगु ल्वापुया झ्वलय् म्हिगः बुधवाः हाकनं ल्वापु जुयाः स्वम्ह विद्यार्थीत घाःपाः जूगु दु । येँया त्रिचन्द्र कलेजय् म्हिगः एमाले अखिल व नेपाली कांग्रेसया नेविसंघया कार्यकर्तातय् दथुइ ल्वापु जूगु खः । म्हिगः अथे निगुलि पक्षं थःथःगु कथं विरोध प्रदर्शन यायेवं अथे निथ्वःया दथुइ ल्वापु जूगु खः । वंगु आइतवाः न्हूगु भर्नायात कयाः त्रिचन्द्र कलेजय् ल्वापु जूगु इलय् एमाले अखिलया छम्ह विद्यार्थीयात नेविसंघया कार्यकर्तातय्सं खुकुरीं पालाः बांमलाक्क घाःपाः यानाब्यूगु खःसा उगु घटनाय् स्वापू दुपि नेविसंघया कार्यकर्तातय्त ज्वनाः तत्काल कारवाही यायेमाः धकाः एमाले अखिलं प्रदर्शन याःगु अले नेविसंघं नं उगु घट्नायात कयाः थःपिनि निम्ह कार्यकर्तायात प्रहरीं ज्वनातःगु जुयाः इमित तत्काल त्वःतेमाः धकाः माग यानाः प्रदर्शन याःगु इलय् म्हिगः अथे तसकं बांमलाक्क हाकनं ल्वापु जूगु खः । अथे ल्वापु जुइवं ब्यापक रुपं प्रहरी परिचालन याःगु खः ।

म्हिगः जूगु ल्वापुइ लानाः एमाले अखिलया निम्ह कार्यकर्ता पराग खडका व राम किशोर सिह अले नेविसंघया प्रेम शाही घाःपाः जूगु खःसा प्रहरीं नेविसंघया कार्यकर्तां सुरेश कुमार यादवयात ज्वनाः यंकूगु दु । थ्व हे दथुइ अखिलं दोषियात ज्वनाः कारवाही मयात धाःसा थौं विहिवाः येँय् मसाल जुलुस यायेगु अले कन्हय् शुक्रवाः स्वनिगः बन्द यायेगु धकाः ख्याच्वः ब्यूगु दुसा नेविसंघं नं थःपिनि कार्यकर्तात तत्काल मत्वःतल धाःसा सशक्त कथंया आन्दोलन यायेगु धकाः ख्याच्वः ब्यूगु दु । सरकारय् दुथ्याःगु निगू विद्यार्थी संगठनपाखें छगू हे खँयात कयाः निगू कथंया माग यानाच्वंगुलि थ्व ल्वापु झन झन तच्वयाः वनीगु सम्भावना अप्वयाः वःगु दु ।