१५ न्हुया निति पौडेलया प्रम

येँ (झीगु स्वनिगः)

वर्तमान कामचलाउ सरकारया प्रधानमन्त्री माधव कुमार नेपालं झिन्यान्हुया निति नेपाली कांग्रेसया नेता रामचन्द्र पौडेलयात प्रधानमन्त्री दयेकेगु धकाः तयादीगु प्रस्तावयात कयाः एमालेया सांसद्तय्सं आपत्ति प्वंकादीगु दु । म्हिगः बुधवाः एमालेया संसदीय दलया ज्याकू सिहदरवारय् च्वंगु संसदीय दलया मुँज्याय् थःगु हे पार्टीया बरिष्ठ नेता प्रधानमन्त्री नेपालं अथे एमालेया नेता पौडेलयात प्रधानमन्त्री दयेकेगु धकाः तःगु प्रस्ताव पार्टीया निर्णयया अःखः जूगु दु धासें सांसदतय्सं आपत्ति प्वंकादीगु खः । नेपालं एकीकृत माओवादीपाखें कामचलाउ सरकारं शान्ति प्रकि्रया सेना समायोजन लगायतया विषययात कयाः ज्या याये फैमखु धकाः धायेवं थःम्हं कांग्रेसया नेता पौडेलयात प्रधानमन्त्री दयेकेगु प्रस्ताव यानागु खः धकाः स्वीकार यानादिसें अथे सेना समायोजनया निति धकाः १५ दिनया प्रधानमन्त्री पौडेलयात दयेकेगु अनंलिपा हाकनं प्रकि्रयागत कथं प्रधानमन्त्री ल्ययेगु धकाः प्रस्ताव तयागु खः धकाः स्पष्ट यानादीगु खः ।

उगु मुँज्याय् व्यवस्थापिका संसदया विशेष अधिवेशनय् प्रधानमन्त्रीया उम्मेदवार पौडेल व एकीकृत माओवादीया प्रस्तावयात विपक्षय् मतदान अनिवार्य रुपं यायेत एमालें सांसदतय्त निर्देशन ब्यूगु खः । मुँज्याय् एमालेया नेतृत्वय् सरकार दुगु इलय् नं सहमतिया निति एमालें माःगु कथं भूमिका म्हितेगु मायात धकाः सांसद्तय्सं तसकं आलोचना तकं याःगु खः ।