विशेष अधिवेशनं ध्रुवीकरण

अन्ततः कांग्रेसया ल्यूल्यू वन एमाले

येँ (झीगु स्वनिगः)

व्यवस्थापिका संसदया दक्ले तःधंगु दल एकीकृत माओवादी नापं न्हय्गू दलया मंकाः गठबन्धन यानाः च्यागू दलं समावेदन दर्ता याःगु आधारय् न्ह्याःगु संसदया विशेष अधिवेशनया झ्वलय् अन्ततः राजनीतिक दलत धु्र्रविकरण जुजुं वंगु दु । एकीकृत माओवादी नापं न्हय्गू चिचीधंगु दल व मेमेगु दलत आःया अवस्थाय् प्रधानमन्त्रीया चुनावी प्रकि्रया समाप्त जूगु ठहर यानाः न्हूगु हे प्रकि्रयां प्रधानमन्त्री ल्ययेगु निति संसदया नियमावली संशोधन यायेमाः धकाः थःपिनिगु धारणा तयाः वयाच्वंगु दुसा आः वयाः नेपाली कांग्रेस नाप ल्यूल्यू वनेगु निति एमालें नं तयारी याःगु दु । सहमतिया आधारय् सरकार दयेकेगु निति आःया प्रधानमन्त्रीया चुनाव अन्त्य यानाः न्हूगु हे प्रकि्रयां वनेमाः धकाः जनतायाथाय् न्ह्यःने धायेगु यानाः वयाच्वंगु एमाले लिपांगु इलय् कांग्रेसपाखे ध्रुवीकरण जुयाः वंगु दु ।

म्हिगः बुधवाः एमाले व कांग्रेसया नेतातय्गु दथुइ जूगु मुँज्यां थौंया संसदया विशेष अधिवेशनय् थःपि विशेष अधिवेशनया विपक्षय् मतदान यायेगु धकाः सहमति जूगु दु । झिहदरवारय् च्वंगु एमालेया संसदीय दलया उगु मुँज्यां आःया अवस्थाय् अनमिनया म्याद नं थप मयायेगु धकाः निगू दलया दथुइ सहमति जूगु दु । अथे हे वर्तमान सरकारय् हे दुथ्याःगु मेगु दल तराई मधेश लोकतान्त्रिक पार्टीं नं विशेष अधिवेशनया विपक्षय् दनेगु धकाः म्हिगः बुधवाः खँ क्वःछ्यूगु दु । आःया अवस्थाय् नं कांग्रेसया नेता रामचन्द्र पौडेलया प्रधानमन्त्रीया उम्मेदवार कायम हे यानाः नियमित अधिवेशनया माध्यमं प्रधानमन्त्री ल्ययेगु पाखे वनेगु धकाः खँक्वःछ्यूगु दु । एमाले व कांग्रेसया नेतातय्सं शान्ति प्रकि्रयायात निष्कर्षय् थ्यंकेमाः धकाः धायेगु अले हाकनं शान्ति प्रकि्रयाया निति महत्वपूर्णगु भूमिका म्हिताः वयाच्वंगु राष्ट्रसंघया राजनीतिक मिसन अनमिनयात लितछ्वयेगु धकाः गुगु कथं खँ पितहयाच्वंगु दु थुकि यानाः गनं एमाले कांग्रेस अनमिनयात लितछ्वयाः नेपालय् भारतीय सुरक्षाकर्मीत दुकयाः माओवादीयात ज्यामिछंकेगु षडयन्त्र यानाच्वंगु जकं मखुला धकाः मनूतय्सं न्ह्यसः तयाहःगु दु ।