नेवि संघ-अखिल ल्वापु
एमाले अखिलपाखें शुक्रवाः स्वनिगः बन्दया घोषणा
झडपय् लाना स्वम्ह घाःपाः, ब्यापक रुपं प्रहरी तैनाथ
येँ (सन्ध्या टाइम्स)/थनया त्रिचन्द्र कलेजय् एमाले अखिल व नेवि संघ कार्यकर्ता दथुइ थौं सुथय् नं तःधंक ल्वापु जुल। उकी लानाः स्वम्ह विद्यार्थी कार्यकर्ता घाःपाः जूगु दु ।
थौं सुथय् एमाले अखिल व नेवि संघं छगू हे इलय् ब्यागलं ब्यागलं प्रदर्शन यायेवं ल्वापु जूगु खः। उकी लानाः अखिलया पराग खड्का व राम किशोर सिंह अले नेविसंघया प्रेम शाही घाःपाः जूगु खः। प्रहरीं सुरेश कुमार यादवयात ज्वंगु दु। कलेजय् ल्वापु जुइवं अन ब्यापक रुपं प्रहरी परिचालन याःगु खःसा ल्वापुया झ्वलय् रत्नपार्क लागाय् तकं यातायात संचालनय् समस्या ब्वलंगु खः ।
वंगु आइतवाः त्रिचन्द्रय् एमाले अखिल विरेन्द्र राउतयात नेविसंघया कार्यकर्तातय्सं भर्ना सम्बन्धी खँय् कचकच जुयाः खुकुरीं पाला बिउगु खः। उगु ल्वापु लिपा एमाले अखिलं खुकुरीं पाःपिं नेवि संघया विद्यार्थीतय्त थौं तकया दुने ज्वनाः कारवाही यायेमाः धइगु माग यासें त्रिचन्द्र कलेजय् प्रदर्शन याःगु खः। उमिसं थौं हे जिल्ला प्रशासन कार्यालयय् ज्ञापन पौ बीगु, कन्हय् येँय् मसाल जुलुस पिकायेगु व कंस शुक्रवाः स्वनिगः बन्द यायेगु ज्याझ्वः तकं पित बिउगु दु। उखे नेविसंघं नं ज्वनातःपिं थः कार्यकर्तातय्त तुरुन्त त्वःतेमाःगु माग यासें थौं त्रिचन्द्र कलेजय् प्रदर्शन याःगु खः। थ्वहे झ्वलय् थौं हानं ल्वापु जूगु खः ।
