प्रधानमन्त्री ल्यज्या हानं अन्यौलय्

प्रधानमन्त्री ल्ययेगु सवालय् हानं विवाद शुरु जूगु दु। पदलोलुप राजनीतिक दल व उकिया नेतातय्सं हानं न्हूगु ढंगं शुरु जुइत्यंगु प्रधानमन्त्री ल्ययेगु ज्यायात नं विवादय् लाकाः देशय् विद्यमान अन्यौलयात अन्यौलतय् तुं लाकेगु पलाः न्ह्याकेत्यंगु खँ थुकिं प्रस्ट जू। उकुन्हु तक तटस्थ जुयाच्वंगु पार्टी एमालें आः थःपिनि तटस्थता तोडे यायेगु धकाः निर्णय याःसां नं भोट सुयात बीगु धइगु बारे धाःसा छुं निर्णय याये फुगु मदुनि। एमाले दुने कांग्रेसया सरकार दयेकेमाः धाइपिं, माओवादीया सरकार दयेकेमाः धाइपिं व थःगु हे नेतृत्वय् सरकार दयेकेमाः धाइपिं स्वंगुलिं हे बिचाःया मनूत दु। थुकिं यानाः थ्व पार्टीं अझ नं ठोस निर्णय याये फयाच्वंगु मदुनि। उखे माओवादी अझ नं थःगु हे नेतृत्वय् सरकार दयेके दयेमाः धइगु पक्षय् दनिसा कांग्रेस नं थःगु हे सरकार गठन यायेगु पक्षय् दु। छुं जुयाः एमालें नं तटस्थ च्वनेगु मखु बरु थःगु हे नेतृत्वय् सरकार दयेकेगु धकाः निर्णय यात धाःसा थुकिं हानं नं प्रधानमन्त्रीया ल्यज्या संकटय् लाइगु निश्चित दु। थ्व इलय् एमालें या त मेगु छगू पार्टीया समर्थन कयाः थःगु सरकार दयेकेमाल कि मखुसा मेगु छगू पार्टीयात समर्थन यानाः मेपिनिगु हे सरकार गठनय् ग्वाहालि यायेमाल। थ्व स्वंगू तःधंगु धाःगु राजनीतिक पार्टी मध्ये छगुलिं मेगु पार्टीयात समर्थन याये धकाः निर्णय मयाःतले प्रधानमन्त्री ल्ययेगु थ्व ज्या अझ नं थाति लानाच्वनीगु निश्चित दु। थ्व इलय् राजनीतिक पार्टीतय्सं सहमति यायेगु तत्परता जक मखु मेगु पार्टीयात ग्वाहालि यायेगु उदारता नं क्यनेमाःगु आवश्यकता दु। मखुसा सरकार गठन अझ नं असम्भव धाःसां जिउ ।

More Stories Like this