निक्वःगु जंक्वय् रमापतिराज शर्मा

कृष्ण प्रजापति

भाषाजवाः भाषाथुवाः भाषाशास्त्री साहित्यकार भाजु रमापतिराज शर्मा चय्निदँ दत। अय्नं वय्कःया जोश जाँगर व उत्साह धाःसा झिंच्यादँ दुम्ह ल्याय्म्हया थें हे तेज दनि। निक्वःगु ज्याःजंक्व यानाः वय्कःया निगू सफू आः नकतिनि हे जक छक्वलं पिदन। थ्व सफू खः 'नेपालभाषा क्रियातय् पुसाग्वः धुकू' व 'नेवाः भाय्या हलिमलिइ झीगु संस्कार व संस्कृतिया जहाँ'। थ्व निगुलिं सफूया चिखिफ्यनेज्या नेपाल साहित्य मन्दिरया नायः तिलकप्रकाश कायस्थं यानादीगु खः ।

थौं स्वयां न्यय्न्हय्दँ न्ह्यः ख्वपय् नेपालभाषाया दकलय् न्हापांगु आधिकारिक संस्था कथं नेपाल साहित्य मन्दिर नीस्वंगु इलय् भाजु शर्मा ल्याय्म्ह हे तिनि। अथे जुयाः सूर्यबहादुर पिवा नापं ख्वपया न्ह्यलुवा भाषासेवीपिनि दथुइ वय्कः नं उगु संस्थाया संस्थापक दुजः जुयादीगु खः। ख्वपय् नीस्वंगु नेपालभाषा साहित्य तःमुँज्याया योजनाकार वय्कः 'तःमुँज्या' खँग्वःया नं आविस्कारक नं खः। वास्तवय् वय्कलं हे 'तःमुँज्या' धइगु नां छुनादीगु खः।
वय्कः नेपालभाषाया ब्याकरणविद् खःसां वय्कःया न्हापां पिदंगु सफू धाःसा चिनाखँ मुना खः। 'जिगु म्ये' नांगु उगु चिनाखँ मुना नेपाल साहित्य मन्दिर नीस्वनाः न्यादँ लिपा नेपाल संवत् १०७८ स (वि.सं. २०१५ सालय्) पिदंगु खः। वयां लिपा वय्कः भाषा विज्ञान व व्याकरण विधाय् समर्पित जुयादिल। थ्वया दथुइ वय्कःया 'नेपालभाषाया बँ नेपालभाषाया नँ' नांगु सफू पिहां वल। आः वयाः वय्कलं भाषाविज्ञान व व्याकरण सम्बन्धी हे निगू न्हूगु सफू छक्वलं पिथनादीगु दु। थ्व बाहेक वय्कलं च्वयादीगु मेगु छगू सफू 'झीगु न्वहा व वया हागः' प्रेसय् दु। उगु सफू नं वय्कःया ज्याःजंक्वया लसताय् हे पिथनेगु कुतः जूगु खः। तर थीथी कारणं निगू सफू पिदंसां थ्व छगू थात। थ्व नं याकनं पिहां वइ हे जुइ ।

नेपालभाषा परिषदं वय्कःयात भाषाथुवाः व भाषाजवाःया उपाधिं छाय्पिया तःगु दु। नेवाः ख्यलय् वय्कः थेंज्याःम्ह भाषाशास्त्री वा भाषा विज्ञानया ख्यलय् दुग्यंक अध्ययन दुम्ह अन्वेषक आःतक पिहां मवःनि धाःसां जिउ। छम्ह भाषाशास्त्रीया ल्याखं वय्कःयात इलय् ब्यलय् जुइगु हनेज्या नं वास्तवय् वय्कःया योगदानलिसे ज्वः मलाःगु खँ सिउपिंसं धायेगु याः। छम्ह बेजोड प्रतिभाया ज्याःजंक्व तकं साधारण रुपं हे जक सम्पन्न जुल धाःसां पाइ मखु। १००० चन्द्रदर्शन कथं वय्कःया छय् छुइपिं हे जक च्वनाः ज्याःजंक्व कुन्हु वय्कःयात बहनी तिमिला थिनाःलि खतय् तयाः इन्द्रायणी द्यः चाःहीकाः रथयात्रा यानाः जंक्वयाज्या क्वचायेकूगु खः ।

याकःकाय पुस्करराज राजोपाध्याय, स्वम्ह म्ह्याय् मनोरमा शर्मा, मनमोहिनी शर्मा व मञ्जरी शर्मा नापं छय्पिं आमोद, प्रमोद व छुइपिं प्रसन्ना, प्रशंसा नापं आः तक पारिवारिक जीवन न्ह्यइपुक हनाच्वंम्ह रमापतिराज शर्मा ख्वपया जक मखु, नेपालभाषा ख्यःया हे छः धिसिलागु थां खः। थज्याःम्ह ज्वःमदुम्ह व्यक्तित्वया निक्वःगु ज्याःजंक्व नापं वय्कलं यानादीगु भाषाया अन्वेषणं झीगु भाषायात परन्तु तकं थातं तयेगु ज्याय् तिबः बी धकाः झीसं आशा यायेफु ।

More Stories Like this