गज्याःपिंत धायेगु बुराबुरि ?
- डा. तुल्सीनारायण श्रेष्ठ
खला जिं थःत बुरा जूगु मतायेकानि । जि यानावयागु यानाच्वनागु ज्या वहे कथं आ तक नं मदिक्क याना हे वयाच्वना तिनि । थाकु मचाःनि । जिगु उसाँय्लय् च्वय्क्वय् जूगु मदुनि । आतक जिगु नयेगु त्वनेगु म्हितेगु द्यनेगु आदि खँय् छुं हिउपाः मवःनि । अझ धाये जिगु यौनशक्ति नं जिगु वैश कथं पाः जूगु खनेमदुनि । जिगु परिवारय् दुने नं जिगु वैशयात कयाः सुनानं चिउता काःगु मदुनि । जि बल्लाःनि । जितः चिउताः तयेमाःगु ई मवःनि । सदां थें मोटरसाईकल गयाः अफिसय् वनाच्वना वयाच्वना । निदँ न्ह्यः ला खःनि पोखराय् वनाः निघौ तँ गयाः शान्ति बनय् थ्यंकागु । अय्नं िजं त्यानु मचाः । ल्याय्म्हतय् सरह तँ गया ।
तर जिं जक धयां ला मजिलनि । जि बुरा मजूनि धकाः जिगु मनय् जक दयां नं ला मजिलनि । सकसिनं जिगु ख्वाःस्वयाः जिगु म्ह स्वयाः जितः बा बाज्या धाल धाःसा छु तंचायेगु ला तंचायाः धाःम्हेसित ब्वःबीगु ला अवश्य मखु । ख्वाः स्वयाः म्ह स्वयाः म्हमसिउपिंसं बा बाज्या धाइगु ला स्वाभाविक हे जुलनि । गनं नं पसः हुँ वा गनं नं चाःहिउ हुँ पसल्या वा म्हमसिउपिंसं जितः बा वा बाज्या धकाः धाइगु जुइ धुंकल । अर्थात जिगु ख्वालय् बुरापहः खनेदये धुंकल । छन्हु दक्षिणकाली वनाः लिहां वयागु । मोहनि स्वन्तिया झाः । हात्तिबनय् छथ्वः मस्त स्यांगुलि खानाः नयाच्वंगु दु । जि मोटरसाइकलं सररर वयाच्वनाम्हसित ! ऐ हजुरबा कटुस खाएर जानुस धकाः धाः बाः मस्तय्सं । झसंग वन का जि ला धाथें बुरा जुल खनीसा ।
आ सदां नापं ब्वनाः ज्या यानाच्वनीपिं पासापिंसं धाःसा गुलिसिनं बुरा जुल धाइ गुलिसिनं धाःसा तुल्सीदाइ न्ह्याबलें ल्याय्म्ह धाइ । थ्व निखलः मनूया खँय् सत्य गुगु पत्ति खः ले ल्याय्म्हतिनि धाःगु सत्य लाकि बुरा जुल धाःगु सत्य ?
मनूयात सरकारपाखें वा समाजपाखें बुराबुरिया परिभाषा यानातःगु दु । सरकारय् ज्या याईपंत ख्वीदँ पुलकि बुरा जुल धकाः जागिरं लिकयाहइ । अथे हे अप्वः अड्डा अफिसय् थ्व हे ख्वीदँयात बुराबुरिया परिभाषा नालातःगु दु । हानं सरकार पाखें हे बृद्धबृद्धा भत्ता धाःसा ख्वीदँ क्यंपिंत मखु न्हय्दँ (सत्तरी वर्ष) थ्यनकि जक बियातःगु दु । सरकारपाखें थथे निगूगु कथंया परिभाषा यानातःगु दु । अथे हे समाजय् नं बुराबुरिया परिभाषा दु । झीगु समाजय् धाःसा सरकारया व परिभाषा लागू मजू । वैश वनां नं बैशं बुराबुरि जूसां नं यदि व मनू बल्लाःनि ज्या याये फुनि ज्या यानाच्वंगु दनि धाःसा वयात समाजं बुरा मधाः । जिमिथाय् स्वक्वः जंकु पुले धुंकूम्ह छम्ह मिजं दु । धिसिलाःनि । बल्लाः नि । त्यंक नयेफुनि । चछि न्ह्यः वःनि । याउँक न्यासि वनेफुनि । वयात बुरा जूसां सुनानं बुरा धकाः धायेगु मयाःनि । बल्लाःम्ह हे धाइतिनि । उसाँय् मदु धयागु मदु । म्हय् छुं पाः जूगु मदुनि । भचा न्हाय्पं मताःगु त्वःताः वयागु शरीर आतक नं तन्दुरुस्त हे तिनि । अथे हे वैशय् ल्वचं कयाः वा छुं नं जुयाः शारीरिक कथं कमजोर जूम्हेसित समाजय् गुलि याकनं बुरा जूगु धाइ । वास्तवय् धायेत्यनाःगु छु धाःसा समाजय् शारीरिक कथं बुराबुरि धायेगु चलन दु वर्षं मखु ।
आ हानं छक्वः विज्ञान वा डाक्टरी शिक्षां बुराबुरिया परिभाषा गुकथं परिभाषित यानातःगु दु उखेपाखे छक्वः नं बिचाः यानास्वये । मनूया शरीर मचांनिसें नीदँ नीन्यादँ तक विकासया क्रमय् लानाच्वनी । शारीरिक विकास पूवनकि मनू वयस्क जुइ । थ्व वयस्क इलय् मनू बल्लाइ । हट्टाकट्टा जुइ । अनंलि न्यय्दँ पुलकि मेडिकल सिद्धान्तं बुरा जुल धाइ । खला न्यय्दँ दुम्ह मनू हट्टाकट्टा जुयाच्वनी । पिनें स्वयेबलय् । तर दुनेंदुनें धाःसा बुलुहुं व मनूया कोष धमाधम सिनावनाच्वनी । न्यय्दँ न्ह्यःतक सिनांवंगु कोषया थासय् हानंहानं न्हून्हूगु कोषं थाय् कयाहइ । न्यय्दँ लिपा सिनावंगु कोष धाःसा सिनांतुं वनी । बुलहुं पिने खनेदइगु बुराबुरि ल्वय् खः - न्हापां ला मिखा बुलुयावनी मिखाया नानिचिया कोष ख्वयावनी । चस्मा तयेमाली । अनंलि मिसातय् थीमज्यू दिनावनी । शरीरय् हमोंनया कोष सिनावनी । योनि सुख्ख जुयावनी । योनि दुने योनिरस सेचन याइगु ग्रन्थि सिनावनी । यौन संपर्क पीडादायक जुइ वा असम्भव तक जुइ । यौन संपर्कया लागी चिकं छ्यलेमाली । थ्व 'मेनोपजल सिन्ड्रोम' खः । मिसात भचा ल्वापुखिचा थें जुयावइ । हीमी चायावइ । लिपा अथें जियावनी । गुलिसितं धाःसा वासः नकेमालेयः ।
अथे हे मिजंतय्त जुइगु बुरा ल्वय् खः प्रोस्टेट तग्वः जुयावयाः पिसाब याये थाकुइगु । तुरुतुरु च्व फाये मालाच्वनीगु । च्व सफा जुइक मवइगु । न्ह्यः मवइगु । ल्वःमनीगु । ल्हाः खाइगु । सः त्यामजीगु आदि । सँ तुयुइगु सँ हाइगु मेगु ल्वय् खः । धुसि लुइगु न्यासि वने मफइगु जँ स्याइगु । तुति स्याइगु आदि वैश वं लिसे खनेदयावइगु ल्वय् खः । थथे बुराबुरि जुलकि थीथी ल्वय् बुराल्वय् खनेदयावइ । अय्सां छम्ह निम्ह बुराबुरित बैश वनां नं बुरा मजू । उकी मध्ये झी सकसिनं म्हसिउम्ह संस्कृतिविद् सत्यमोहन जोशी छम्ह नं खः ।
जि ला बुरा जुल । जिके च्वय् न्ह्यथना कथंया नितास्वता बुराल्वय् थाये धुंकल । वासः नयेमाले धुंकल । उकिं जितः बुरा मजूनि धाईपंसं जिगु मन तयेत जक जितः अझ प्रोत्साहन बीगु लागि जक धाःगु जुइमाः । मखुसा ला जि बुरा जुइ धुंकूगु हे खः । थुकी निगू मत मदु । न्हय्दँ क्यने धुंकूम्ह मिजंयात बुरा मधाःसा छु धायेगु ?
आः छि नं बुराबुरि जुल ला कि मजूनि छक्वः दुवाला स्वयादिसँ । सकलें जिमिथाय् च्वंम्ह बुरा व सत्यमोहन ला जुइ फइमखु । समाजय् अज्याःपिं ला अपवादं जक दइगु खः । मनूया शरीर लाक्वँय् हि आदि टिस्यूपाखें दयेकातःगु खः । न्हिं न्हिं संकेमा न्हिंन्हिं सनेमाः थलबल ला छ्यछ्यं छ्यछयं ज्यलावं प्वाः गना वं धाःसा लाहिया शरीर छ्यछ्यं ज्यला मवनी धयागु ला खँ हे मंत । द्वलंद्व क्वः लखंलख क्वः सासः ल्हानाच्वनी नुगःचु सनाच्वनी ज्यला ला वंहे वनी । वैशय् ज्यःगु हानं हानं दयेकी । बैश वनेधुंकाः उलि याकनं दयेके फइमखु । अले ज्यला वँवंवँवं छन्हु म्वाये मफयेक ज्यलावनी । अले मनू सिनावनी । मनू सिनावनीगु धइगु हे मनूया म्हय् च्वंगु कोष सिनावनीगु खः । आतक थ्व ल्वय्या वासः व ज्यला मवंक यथावत तयातयेगु उपाय लुयामवःनि । शायद लिपा लुयावइगु खःला । न्ह्याथे यानाःसां ताम्वायेगु स्वयादिसँ गनं अझ ताम्वायेगु लँ लुयावइगु खःला ?
