च्वापुं गाया कि्रस्टमसया बिदाय् वनेत पंगः

लण्डन (एएफपी)

वंगु छुं वालंनिसें युरोपन्यंक छक्वःपतिकं आपालं वःगु च्वापुं गाया कि्रस्टमस बिदाय् छेँय् लिहाँ वनेमास्ते वःपि गन्तव्यतक्क थ्यंकेमलायेवं अलपत्र जूगु दु । लण्डन पेरिस प्रुंकफर्ट आम्स्टरड्याम व ब्रुसेल्स थेंज्याःगु तःधंगु अन्तर्राष्ट्रिय विमानस्थलय् द्वलंद्वः यात्रुत छेँय् लिहाँ वनेमखनाः आक्रोशित जूगु दु । थुगु वाःया लिपांगु दितक्क थःथःगु गन्तव्यय् थ्यंकाः दच्छिया तःधंगु नखः थःथितिपिलिसे च्वनाः हनेमखनीगु खःकि धइगु शंकां फुक्कसित च्यूताः अप्वयेकाः ब्यूगु दु । वंगु स्वन्हु प्यन्हुनिसें विमानस्थलय् हे उपि चाः न्हिं छ्यायेत बाध्य जूगु दु । युरोप महादेशन्यंक तच्वःगु च्वापुं गाया सतक रेल्वे व हवाई यातायात नापं पंगः जूगु दु । थीथी देय्या विमानस्थल अधिकारीतय्सं वनेमखनाः च्यूताः कयाच्वंपि यात्रुपिनिगु मनोराजनार्थ थीथी ज्याझ्वःत हःसां नं छु नं प्रभावकारी जूगु मदु ।

आक्रोशित यात्रुपिसं लण्डन हिथ्रो विमानस्थलदुनेया टर्मिनल नं. ३ सं हाःहू न्यंकाः सिलः डसना नापं खुनाः ब्यूगु दु । न्हियान्हिथं आपालं डोजर व ट्रक परिचालन याःसां नं च्वापु सफा यायेफयाच्वंगु मदुनि । अःखतं वंगु शनिबाः तच्वःगु च्वापुं गाया जनजीवन अझ पंगः जूगु जानकारी ब्यूगु दु । बेलायतया उत्तर आयरल्याण्डय् तापक्रम म्हो जुयाः माइनस झिन्हय्गू दशमलव खुगू डिग्री सेल्सयसतक्क थ्यंगु दु । आपालं चीकूगु हुनि इटालीइ निम्ह छेँ बुँ मदयेकाः च्वंपि मनूत सीगु अवस्थाय् लुयावःगु दु ।

More Stories Like this