माओवादी व सत्ताधारी दलतदथुइ वार्ता
येँ (झीगु स्वनिगः)
पंगः क्वचायेकेगु लिसे राजनैतिक लिच्वःया निति संविधानसभाया दकले तःधंगु दल एकीकृत नेकपा माओवादीं मंगलवाः सत्ताधारी दलत एमाले व कांग्रेसलिसे ब्यागलं ब्यागलं सहलह याःगु दु । विशेष अधिवेशन न्ह्यः हे दलतदथुइ सहमति मालेत माओवादीया कुतलय् जूगु वार्ता सकारात्मक जूसां नं लिच्वलय् धाःसा मथ्यंगु वार्ताय् ब्वति दुपि नेतातय्सं जानकारी ब्यूगु दु । माओवादीं एमाले नायः झलनाथ खनाल याकः व सनिलय् एमालेया नेतातलिसे व कांग्रेस नेतातलिसे सहलह याःगु खः । कांग्रेस सभापति सुशिल कोईरालाया छेँय् महाराजगाजय् जूगु सहलहसं एकीकृत नेकपा माओवादी व कांग्रेस निखलसिनं सरकारया नेतृत्वया दाबी कायम तःगु खः । सहलहलिपा माओवादी न्वकु नारायणकाजी श्रेष्ठ प्रकाशं निगुलि दलं थःगु नेतृत्वय् सरकार दयेकेमाःगु खँ तयादीगु जानकारी बियादीगु खः ।
अथेहे बैठकय् माओवादीं संविधान मदयेकूतले पुलांगु हे म्याण्डेटकथं अनमिनया ई तनेत प्रस्ताब याःगु दु । लिसलय् कांग्रेसं धाःसा अनमिनया ई तनेत म्याण्डेड हिलेमाःगु सर्त न्ह्यःने न्ह्याकूगु दु । अनमिनया ई थ्वहे पुस मसान्तय् क्वचायेत्यंगु दु । सहलहसं माओवादीपाखें नायः प्रचण्ड न्वकुपि डा. बाबुराम भट्टराई व नारायणकाजी श्रेष्ठ प्रकाश व मू छ्यान्जे रामबहादुर थापा बादलया ब्वति दुगु खः ।
