तुया भाः थमकाःसा किसानं चिनी मिलयात तु मबीगु

रौतहट (झीगु स्वनिगः)

तुया भाः थमकाःसा रौतहटया किसानतय्सं चिनी मिलयात तु मबीगु खँ क्वःछ्यूगु दु । तु उत्पादक सङ्घ रौतहटया दाँभरि जयनाथ यादवं तुया भाः विषयसं छुं दि न्ह्यः जूगु वार्ता ताःमलाःगु धयादिसें सरकारं तुयात राष्ट्रियबाली कथं मकाःगु कारण तुया भाः थकाःगुलिइ सरकार उदासिन दुगु द्वपं बियादिल । श्रीराम चिनी मिल्सया प्रशासकीय अधिकृत जयमङ्गल यादवं भारतपाखें अवैधरुपं चिनी नेपाः दुहाँवःगु कारण चिनीया भाः थहाँवनेमफूगुलि तुया भावय् भाः थकायेत ज्यामिछंगु धयादिल । आःया भाःप्रति क्विन्टल प्यसः व छतका अप्वयेकेमाःगु व थमकाःसा किसानतय्सं श्रीराम चिनी मिल्सयात तु मबीगु धाःगु दु । रौतहटया तु उत्पादक किसानयात मिल्सं तुया पुसा न्यायेगु निति करिब ख्वीगू लाख ऋण उपलब्ध याःगु धयादिसें अधिकृत यादवं झिन्हुयादुने तुया भाः समायोजन जुयाः क्रसिङ्ग न्ह्याइगु जानकारी बियादिल । वंगु दँ स्वयाः थुगु दँ छुं दि तु क्रसिङ्ग लिबाःगु मिलं जानकारी ब्यूगु दु ।

रौतहटय् खुद्वः बिघाय् जक तु प्यूगु चिनी मिल गरुडां जानकारी ब्यूगु दु । किसानं साखःया निति तु थःम्हं पेले मयाःसा थुगु दँ मिलं नीगू लाख क्विन्टल चिनी उत्पादन यायेगु लक्ष्य काःगु मिलं जानकारी ब्यूगु दु । रौतहटय् किसान थःम्हं खादसारी चायेकाः तुपाखें साखः दयेकेगु यानाः वयाच्वंगु दुसा तुया भाः थहाँवनी व चाये धइगु कुतलय् आपालं तु किसानिपं पियाच्वंगु दु । तु उत्पादक महासङ्घं धाःसा तुया भाः अप्वयेकेत माग यासें आन्दोलन नापं न्ह्याकूगु दु ।

More Stories Like this