डाबरया जनस्वास्थ्यप्रति खेलवाड

भारतया तःधंगु लगानी दुगु डावर नेपालं उत्पादन याना वयाच्वंगु रियल जुसय् की व लेउ लुगु छुं ई लिपा निला जक म्याददैगु रियल जुसया लांलां लिपाया म्याद तयाः वजारय् यंकेगु यानाच्वंगु दु । सोमवाः रियल जुसया उत्पादन न्हि स्वया लच्छिलिपा न्हि तयाः नेपाःमि जनतायात धों लायेगु व इमिगु स्वास्थ्य नाप खेलवाड यायेगु अपराध याःगु दु । वहुराष्ट्रिय कम्पनीया नामय् भारतं नेपाःया प्राकृतिक श्रोत व जडिवुटीत थःगु कब्जाय् कयाः नेपाःमि जनताया आर्थिक श्रोत जडिबुटित दंकं भारतय् यंकाच्वंगु दु ।

नेपालय् लगानी यानाः भारतं नेपाःया औद्योगिक विकासय् ग्वाहालि यायेगु धयावःसां व्यवहारय् लूटया वजार न्ह्याका वयाच्वंगु स्पष्ट दु । डावर नेपालं नेपालय् सौन्दर्य सामान निसें कयाः वासः व रेडिमेड नसा ज्वलंत दयेकाः नेपाः व भारतया थीथी सहरय् छ्यलावयाच्वंगु दु । उगु उत्पादनत मध्ये छगू खः रियल जुस । रियल जुसया न्हाया नं तक्वः की व लेउ दुगु जुस वजारय् खने दये धुंकूगु व उकियात कयाः सरकारं छुनं कार्यवाही मयाः मन्ह्याकू । नयेगु सामान धयागु सीमित ईया दुने उपभोग यायेगु जरुरी जुइ । उगुहे कारणं नसा ज्वलंलय् न्ह्यावलें दयेकूगु न्हि व फुइगु न्हि न्ह्यथने माःगु कानुनी प्राबधान दयेका तःगु खः । रियल जुसं उगु कानुनी प्रावधानयात हाचां गयाः निला न्ह्यःया न्हितयाः नेपाली व भारतीय जनताया स्वास्थ्यय् तप्यंक खेलवाड यायेगु जमर्को याःगु दु यानावःगु दु ।

रियल जुसयात कयाः न्हापा नं तक्वः तःथाय् लिउ व की लुयावःगु खँय् उपभोक्ता संघ व सर्वसाधारण जनतां गुनासो याःसां सरकारं ध्यान मब्यू । रेडिमेड नसा व वासः धयागु छगू अवधिया दुने उपभोग मयात धाःसा व छगूकथंया विष जुइ । एक्सपायर डेटया वासः वा नसा नल धाःसा उकि स्वास्थ्ययानिति घाटक जुइ । सरकारया थुगुहे लापर्वाहीं फाइदा कयाः डावर नेपालं नेपाली जनताया स्वास्थ्ययात नकारात्मक लिच्वः त्वःतीगु जुस उत्पादन यानाः नकाच्वन ।

जुस धयागु अप्वः मस्तय्त नं त्वंकीगु याइगुलि की व लेउ दुगु जुस त्वनाः गुलि मस्त विरामी जुल जुइ जाडापखालाया शिकार जुल जुइ । थुकिया ल्याः चाः मदु । वजारय् पिहावयाच्वंगु जुसय् की व लेउ लुयावःसा उकियात तत्काल कारवाही यायेमाःगु खः । तर भारतया चम्चागिरी याना वयाच्वंगु दलाल नेपाःया सरकारं थुखेपाखे ध्यान मवीवं निलाया म्याद तिके माःथाय् निला लिपाया म्याद तिकाः खुलेआम बदमासी याःगु दु ।

छुंदँ न्ह्यः भारतीय कलाकार अमिताभ बच्चन नाप करौडौंया विज्ञापन सम्झौता याःगु डावर नेपालया उत्पादनत गुणस्तर मदुगु व स्वास्थ्यया निति घाटक धयागु खँयात थुकि प्रमाणित यानाहःगु दु । रियल जुस नयेमज्यू थें मेमेगु खाद्यान्नतय्गु अवस्था नं थ्व स्वयाः बांलाइ धकाःला पत्याः याये थाय् मन्त । उकि भारतीय उगु संस्थां दयेकूगु रियल जुसया नाप नापं मेमेगु उत्पादनत नं छ्यलेगु छुंनं मिखाकुलि बुद्धिमानी मखुत ।

डावर नेपालं उत्पादित सामानया नाप नापं भारतं दुहांवयाच्वंगु मेमेगु सामानत नं गुलित गुणस्तरय् पक्का वा कच्चा धयागु खँय् नेपाली जनता जागरुक जुइमाः । स्वदेशय् उत्पादित वस्तुत जक छ्यलेगु जुइमाः । स्वदेशय् उत्पादित वस्तुत जक छ्यलेगु पल्सा भारतीय सामानत वुलुंवुलुं वहिस्कार यायां वनेमाः । थःपिनिगु स्वास्थ्यया निति थथ्य यायेगु आवश्यक जक मखु अति जरुरी जुइधुंकूगु दु ।

More Stories Like this