सभासद् दिलिप महर्जनया अबु दिलसिंह महर्जन मन्त
किपू (झीगु स्वनिगः)
एकीकृत नेकपा माओवादीया सभासद् नापं झीगु स्वनिगः न्हिपौया सल्लाहकार दिलिप महर्जनया अबु दिलसिंह महर्जन ७७ दँय् म्हिगः मंगलवाः सुथय् मन्त । किपू नगरपालिका वडा नं. ९ या दिलसिंह महर्जन मदयेवं म्हिगः हे सिथं यंकेगु ज्या नं जूगु दु । भाजंगाःया दिपय् मदुम्ह महर्जनया स्वम्ह काय्पि दिलिप महर्जन बासु महर्जन व सोम महर्जन स्वम्हेस्यां हे छक्वलं मिँ तयेगु ज्या जूगु खः । वय्कः समाजसेवी नापं तत्कालिन अवस्थाय् वडा दुजः पदय् निर्वाचित तकं जुयाः ज्या यानादी धुंकूम्ह खः ।
मदुम्ह महर्जन पांगाया चीगुथिया नायः नं खः । थःगु हे छेँ पांगाया नमख्वाः त्वालय् मदुम्ह वय्कःया छम्ह म्ह्याय् दु । सभासद् दिलिप महर्जनं म्हिगः दिपय् अन्तिम श्रद्धाजलीया झ्वलय् मदुम्ह थः अबुया नामं स्वास्थ्यया निति १ आना जग्गा फ्यायेगु जुइ धकाः प्रतिबद्धता प्वंकादीगु खः ।
किपू नगां पांगाया स्थानीय मनूत माओवादीया नेतात विप्लब हितमान शाक्य दिलबहादुर श्रेष्ठ पम्फा भुषाल झक्कु प्रसाद सुवेदी इश्वरी दाहाल दिलिप कुमार प्रजापति पवनमान श्रेष्ठ नापं मेमेपि नं मदुम्ह महर्जनयात अन्तिम श्रद्धााजली बीगु निितं वय्कःया छेँय् वनेगु नापं सिथं यंकूथाय् सनाः वनेगु तकं याःगु खः ।
