यःमरि पुन्हि ज्यापु दिवस

येँ (झीगु स्वनिगः)

नेवाःतय्सं दँय् दसं थें म्हिगः मंगलवाः नं यःमरि पुन्हि यःमहि्र दयेका नयाः हन । यःमरि पुन्हियात दच्छिया दक्ले ताः हाकःगु चा अले दक्ले चीहाकःगु न्हि कथं नालातःगु दु । यःमरि पुन्हिया दियात हे ज्यापु संस्कृति विकास कोषया आह्वानय् ज्यापु दिवस हनेगु झ्वलय् म्हिगः नं उगु हे कथं दिवस हनेगु ज्या यात ।

ज्यापु दिवस कंगः अजिमा खलः कार्य व्यवस्थापन समिति यतखा त्वालं न्ह्याकूगु सांस्कृतिक झाँकी नापंया जुलुस थाय् थासय् चाःहिलाः बसन्तपुरय् वनाः क्वचायेकूगु खः । बसन्तपुरय् ज्यापु संस्कृति विकास कोषया ग्वसालय् विशेष समारोह याःगु खःसा अन थीथी ख्यलय् योगदान यानादीपि ज्यापुतय्त हनेज्या नं याःगु खः ।