साजयकुमारया नेतृत्वय् मधेश क्रान्ति फोरम

येँ (झीगु स्वनिगः)

वर्तमान कामचलाउ सरकारय् दुथ्याःगु मधेसी जनअधिकार फोरम लोकतान्त्रिक अन्ततः तज्याःगु दु । माधव नेपालया वर्तमान सरकार गठन यायेगु निति विजय कुमार गच्छेदारं मधेशी जनअधिकार फोरम तछ्यानाः मधेसी जनअधिकार फोरम लोकतान्त्रिक गठन याःगु खःसा आः व हे गच्छेदारया नेतृत्वय् दुगु मधेसी जनअधिकार फोरम लोकतान्त्रिक हाकनं तछ्यानाः मधेस क्रान्ति फोरम गठन याःगु खः । पार्टीयात तछ्यानाः मधेस क्रान्ति फारम दयेकेगु ज्या आःया सरकारय् भौतिक योजना नापं निर्माण राज्य मन्त्री जुयादीम्ह नेता साजय कुमार शाहया नेतृत्वय् जूगु खः । न्हूगु पार्टी नायः जुयादीम्ह साजय कुमार शाह लोकतान्त्रि फोरमया केन्द्रीय दुजः खः ।

न्हूगु गठन याःगु पार्टीइ फोरम लोकतान्त्रिकया केन्द्रीय दुजः नापं कृषी तथा सहकारी राज्यमन्त्री करिमा बेगम रामलाल सुतिहार रामेश्वर शाह नीलम बर्मा कौशलकुमार यादव रमानन्द मण्डल रामबचन अहिर ललिता शाह सेवकीदेवी दास वकील मुसलमान शिवनारायण उराब नापं मेमेपि नेतात दुथ्याः धकाः धाःगु दु । अथे न्हूगु पार्टी मधेस क्रान्ति फोरमु या घोषणा सभा निवाःया दुने यायेगु जुइ धकाः धाःगु दु । उगु घोषणा सभाय् पार्टीया केन्द्रीय कार्यसमिति निसें जिल्लाया इन्चार्जतय्गु नां तकं सार्वजनिक याइ धकाः धाःगु दु । आः तक कार्य समितिया नां धाःसा गोप्य तयातःगु दु । मधेसी जनअधिकार फोरम लोकतान्त्रिकं मधेसया मुद्दायात बेवास्ता याःगु नापं नेतृत्व यानादीम्ह गच्छेदारं मनपरि कथं पार्टी संचालन याःगुलि बाध्य जुयाः मधेस जनताया निति अथे पार्टी तछ्यायेमाःगु खः धकाः धाःगु दु । थ्व हे दथुइ न्हू गठन याःगु पार्टीया नेता कार्यकर्तातय्त म्हिगः मंगलवाः येँया बागबजारय् च्वंगु छगू होटलय् प्रशिक्षण बिइगु ज्या तकं जूगु दु ।