म्याद थपया खँय् कांग्रेस सकारात्मक

येँ (झीगु स्वनिगः)

नेपाःया शान्ति प्रकि्रयाय् महत्वपूर्णगु भूमिका म्हिता वयाच्वंगु संयुक्त राष्ट्रसंघीय मिसन अनमिनया म्याद थप यायेगु एकीकृत माओवादीया प्रस्तावयात नेपाली कांग्रेसं सकारात्मक रुपं काःगु दु । माओवादीया नायः पुष्पकमल दाहाल प्रचण्डया नेतृत्वय् उगु पार्टीया नेतात व नेपाली कांग्रेसया सभापति शुशिल कोइरालाया नेतृत्वय् मेमेपि नेतात दुथ्याकाः म्हिगः मंगलवाः जूगु वार्ताय् कांग्रेसया नेतातय्सं अनमिनया म्याद थप यायेगु खँयात सकारात्मक रुपं कयादीगु खः । कांग्रेसया नेतातय्सं अनमिनया म्याद थप यायेगु तर अनमिनया म्याण्डेटयात धाःसा म्हो यायेमाः धकाः वार्ताय् खँ हःगु खः । वार्ताय् माओवादीया नेतातय्सं अनमिनया म्याण्डेट यथावत हे तयाः वइगु जेष्ठ १४ गते तकया निति म्याद थप यायेमाः धकाः प्रस्ताव तःगु खः ।

कांग्रेसया सभापति सुशील कोइरालाया निवास महाराजगाजय् जूगु उगु वार्ताय् माओवादीया नेतात न्वकुपि मोहन बैद्य किरण डा. बाबुराम भट्टराई नारायणकाजी श्रेष्ठ प्रकाश मू छ्यान्जे रामबहादुर थापा बादल अथे हे कांग्रेसया संसदीय दलया नेता रामचन्द्र पौडेल कृष्णप्रसाद सिटौला रामशरण महत्त प्रकाशशरण महत्तपिन्सं ब्वति कयादीगु खः । उगु वार्ताया झ्वलय् माओवादी व कांग्रेसया नेतातय्सं सरकारया नेतृत्वया सवालय् थःथःगु अडान तःगु खः । माओवादी व कांग्रेसया शीर्ष नेतातय् दथुइ वार्ता जुइवं हीमीचायाः नेपाली कांग्रेसया नेता शेरबहादुर देउवायात नापलाय्त प्रधानमन्त्री माधवकुमार नेपाल उपप्रधानमन्त्री विजयकुमार गच्छेदार देउवा निवास बुढानिलकण्ठय् वंगु खः ।