'प्रमया नितिं पौडेल अस्वीकार'
येँ (सन्ध्या टाइम्स)/ एमाले अध्यक्ष झलनाथ खनालं नेपाली कांग्रेस संसदीय दलया नेता रामचन्द्र पौडेलयात प्रधानमन्त्रीया रुपय् स्वीकार याये फइ मखु धयादीगु
दु। एकीकृत माओवादीया अध्यक्ष पुष्पकमल दाहाल 'प्रचण्ड'लिसे सहलहया झ्वलय् थौं वय्कलं थ्व खँ धयादीगु खः ।
अध्यक्ष खनालं प्रधानमन्त्रीया रुपय् पौडेलया नां थःपिंसं प्रस्ताव यानागु हे मदु धकाः नं स्पष्ट यानादीगु दु। वय्कलं आः तक नं एमालें संस्थागत रुपं पौडेलया उम्मेदवारी लित कयाः सहमतिया निंतिं वातावरण दयेकेमाः धकाः हे धयाच्वनागु खँ नं स्पष्ट यानादिल ।
म्हिगः स्वंगू दल नापं प्रधानमन्त्री नं दुथ्याःगु छगू बैठकय् प्रम माधव नेपालं पौडेलयात प्रधानमन्त्री दयेकेमाः धकाः प्रस्ताव तःगु सम्बन्धय् माओवादी अध्यक्ष प्रचण्डं तःगु जिज्ञासाया लिसः बिसें खनालं थ्व खँ धयादीगु खः।
मेखे प्रम नेपालं पार्टीं यानातःगु निर्णयया अःखः पौडेलयात प्रधानमन्त्री दयेकेगु प्रस्ताव तःगुलिं एमालेया संस्थापन पक्षं असन्तुष्टि प्वंकूगु दु। एमाले अध्यक्ष खनाल व उपाध्यक्ष अशोक राई थौं सुथय् प्रचण्ड निवास वनाः थुकिया विषयय् सहलह ब्याकेगु ज्या जूगु खः ।
छुं न्हि न्ह्यः जक क्वचाःगु एमाले केन्द्रीय कमिटीया बैठकं कांग्रेस नेता पौडेलयात उम्मेदवारी लित कायेत इनाप यायेगु अले उम्मेदवारी लित मकाल धाःसा विपक्षय् मतदान यायेगु धकाः सर्वसम्मतिं निर्णय याःगु खः ।
