जयया 'स्टाय्च्यू अफ लिबर्टी'

लिबर्टी स्वतन्त्रताया झ्वातायात छ्वालिं दयेकल धायेबलय् छितः पत्याः याये थाकुइफु । तर दच्छि व नीन्हु तक मदिक्क कुतः यानाः पन्तिया छम्ह ल्याय्म्ह भाजु जय मानन्धर अज्याःगु मूर्ति छ्वालिं दयेकेत सफल जूगु दु । प्रान्सय् जूगु युद्धया इलय् छम्ह म्हमसिउम्ह मनुखं पःखालय् गयाः मत क्यन । उगु मतया जलं यानाः आपालं मनूतय् ज्यान बचे जुल । लिपा स्वतन्त्रताया प्रतीक कथं वयात खंम्ह सुं मूर्तिकारं यक्व लिपा उकिया मूर्ति दयेकल । उगु मूर्ति लिपा अमेरिकायात उपहार बिल । उगु मूर्ति आः स्वतन्त्रताया चिं कथं अमेरिकाय् धस्वाकातःगु दु । विश्वया न्हय्गू आश्चार्य मध्ये छगू कथं कयातःगु थुगु मूर्तिया न्हाय्प्वाः खुगू फिट तब्या । अथे धइगु मनू दुहांपिहां जुइजिउ । छवाः न्ह्यः भृकुटी मण्डपय् ब्वयेहःगु छ्वालिया स्टाय्च्यू अफ लिबर्टी धाःसा अय्भनं तःधं मजू । उगु मूर्ति स्वंगू फिट व प्यंगू इन्च तःजाः । अथे खःसां उगु मूर्तियात सम्भवतः आः तकया दक्कलय् तःधंगु छ्वालिकला कथं हे कयातःगु दु । न्यय्द्वः दां खर्च यानाः उगु मूर्ति तयार याःगु खः ।

अमेरिकाय् धस्वाकातःगु लिबर्टी अफ स्टाय्च्यू अमेरिकाय् थ्यंके यंकूगु इलय् स्वकू कुचा यानाः जक यंकेफुगु खः । छ्वालिकलाया मूर्तिकार जय मानन्धरं तयार यानादीगु छ्वालिया मूर्ति नं अथे हे दुरुस्त स्वंकू कुचा यानाः दयेकातःगु दु । स्वंकू कुचा स्वानाः तिनि अन छगू पूर्ण मूर्ति तयार जुइ । आः अमेरिकाय् वनाः उगु मूर्ति स्वःवनेम्वाल । पन्तिया ल्याय्म्ह भाजुं थुगु मूर्ति छ्वालि कलां दयेकादीगु दु । उगु मूर्ति वंगु वालय् जूगु नीक्वःगु औद्योगिक ब्यापार मेलाय् भृकुटी मण्डप दुने ब्वयातःगु खः । छम्ह नेपाःमिं ला वय्कःया उगु मूर्तियात झिंन्याद्वः अमेरिकी डलर तकं बी धुंकूगु खः । अन मूर्तिकारं उगु स्टाय्च्यू अफ लिबर्टी मूर्तिया मू प्यंगू लाख धकाः तयातःगु दु । तर न्हापालाक अमेरिकी राजदूतयात छक्वः क्यनाः जक उगु मूर्ति मीगु वा छु यायेगु धइगु खँ क्वछीगु कलाकार जय मानन्धरया विचाः दु । झिंस्वदँ न्ह्यवंनिसें थुकथंया छ्वालि कलाय् थःत पानादीम्ह जय मानन्धरं आः वया विश्वय् नांजाःगु मूर्ति तकं तयार यानाः मनूतय्त थुकथं अजू चायेकाबिउगु दु ।

वय्कलं उगु ब्वज्याय् स्वतन्त्रताया मूर्ति नापं तुं छगू गौतम बुद्धया तसकं हे बांलासेच्वंगु मूर्ति नं खालय् दुने तयाः ब्वयाः मियातःगु खः । स्वतन्त्रताया मूर्ति धाःसा तःधंगु हे आकारय् खुल्ला रुपं ब्वयातःगु खः । गुगु मूर्ति नीक्वःगु औद्योगिक मेलाया दक्कलय् आकर्षक वस्तु कथं अप्वः हे स्वकुमितय् दथुइ नं चर्चित खः । एस.एल.सी. छगू पास याये धुंकाः पन्तिया थःगु छेँय् हे च्वनाः स्वअध्ययनं वय्कलं छ्वालि कला सयेकादीगु खः । छ्वालियागु कलाकृति तयार यायेगु झ्वलय् वय्कलं छगू दशक लिपा थुकथं हे विश्वय् नांजाःगु थीथी मूर्ति व अजू चायापुगु वस्तुयात छ्वालिया माध्यमं तयार यानादिल । वय्कःया अज्याःगु मूर्ति देश विदेशय् तकं प्रचार जुजुं वन । झीगु देशया नांजाःपिं नेता राष्ट्रपति भवन, मन्त्री व प्रधानमन्त्रीथाय् तकं वय्कःया मूर्ति थ्यनाच्वंगु दु । आः राष्ट्रपति डा. रामवरण यादवया निवास सितल निवासय् प्रचण्ड निवास बालुवाटारय् नापं सिंहदरवार व थीथी मन्त्री क्वाटरय् नं वय्कःया अज्याःगु थीथी कथंया छ्वालिं दयेकातःगु थीथी कलाकृतित ब्वयातःगु दु ।

मां नानीमैंया मानन्धर व अबु मुक्तिनाथ मानन्धरया काय वय्कः विक्रम संवत २०३५ सालया असार ३१ गते पन्तिइ बूम्ह खः । जय मानन्धरं स्थानीय इन्द्रेश्वर उच्च माविं एस.एल.सी. पास यानादीम्ह भाजु जय मानन्धर लिपा थःगु पुलांगु लजगाः त्वःताः थुगु ज्याय् समर्पित जुयादिल । घरेलु महासंघपाखें नं वय्कःयात छम्ह इमान्दार कलाकार कथं म्हसीकाः दसिपौ बियातःगु दु । छ्वालियात गुलि फत उलि चुतुचुलाः थीथी बां लुइकः तलतल थिकाः कथं झिंनिदँ तक रंग ब्वलामवनीगु यानाः उगु मूर्ति तयार यानातःगु दु । पन्तिइ अपांगत व भ्वतय् न्हाय्पं मताःपिंत छ्वालिकलाया तालिम नं बीधुंकूम्ह जय मानन्धरं थुगु स्टाय्च्यू अफ लिवर्टी तयार यानाच्वँच्वं हे थगुने वकःया मां व अबु निम्हं मंत । अय्नं थःगु अथक कुतलं वय्कलं उगु मूर्ति पुवंका हे दिल व आः वयाः झी नेपाःमितय्सं गर्व यायेबहम्ह कलाकार जुयाः झीगु न्हयःने दंझाल । थ्व छगू सुखद् आश्चर्य खः ।

न्ह्यब्वःम्ह : कृष्ण प्रजापति

More Stories Like this