विशेष अधिवेशन उपयोगी जुइमाः

कृष्ण प्रजापति

मंसीर ३ गते सदनय् घारघुर जुयाःलि अपर्झट क्वचायेकूगु व्यवस्थापिका संसदया बैठक लछि लिपा हाकनं विशेष अधिवेशन कथं न्ह्याःगु दु। सत्तासीन पार्टीतय्त सदनय् बजेट प्रस्तुत याके मबीवं अधिवेशन हे क्वचायेकाः प्रधानमन्त्री चयन, बजेट पारित याकेगु वा मयाकेगु लगायत थीथी महत्वपूर्ण विषय थाति हे तयाः सदन क्वचायेका छ्वयेगु अवसर बिउगु एकीकृत माओवादी लगायत न्हय्गू राजनीतिक दलं राष्ट्रपति समक्ष समावेदन यायेवं हाकनं छक्वः स्वतन्त्र रुपं थःपिनि असन्तोष सदनय् न्ह्यब्वये दइगु कथं सदन खुल्ला जूगु दु। तर सदनय् राष्ट्रपतिया पौ जक न्यंकाः न्हापांगु दिंया बैठक प्यन्हु तकया लागिं स्थगत जूवन। थ्व छगू अधिवेशन चले जुइगु न्हापा न्हापाया परम्परा व नेपाली शैलीया हे अःखः जूवंगु दु। न्हापा जूसा विशेष अधिवेशन सःतीबलय् समावेदन याःगु दलया नेतातय्सं प्रस्तावया उद्देश्य ध्वाथुइकी कथं न्ववाइगु व वयां लिपा मेमेगु राजनीतिक दलतय्सं प्रस्तावया सैद्धान्तिक पक्षबारे न्ववाइगु ज्याझ्वः दयेकीगु खः। तर थुगुसी न्हापांखुसी व्यवस्थापिका संसदया अधिवेशन च्वने न्ह्यः हे स्वंगू दलया बैठक च्वंगु खः। स्वंगू दलया बैठकं क्वःजी कथं हे सदनय् आइतवाःया बैठकय् सहलह तकं मयाकुसें वइगु पुस ८ गते तकया लागिं सदनया बैठक स्थगन याःगु खः ।

खय्त ला राष्ट्रिय स्तरया नेतातय्सं हे आः राजनीतिक दलतय् दथुइ सहमति मजुइकं मेगु अधिवेशन सःते मजिउगु खँ धया वयाच्वंगु खः। प्रधानमन्त्री चयन लगायत थीथी महत्वपूर्ण विषयय् अथे सहमति मदयेकं बैठक सःतल धाःसा सदनया ई जक सितिं वनीगु जुया नेतातय्सं थ्व तर्क तयाच्वंगु खः। तर सदन चले जूगु इलय् नं खालि सदनय् वनाः भत्ता पाके यायेगु व झिंखुक्वः तक निश्कर्षहीन चुनाव यायेगु बाहेक मेगु वास्ता मदुपिं तःधंगु राजनीतिक दल कथं कायम जुयाच्वंगु एकीकृत माओवादी स्वयमं समावेदन याःगुलिं थ्व बैठक सःतेत राष्ट्रपतियात बाध्य याःगु खः। थुगु बाध्यकारी प्रावधानयात नं आः उपयोग यानाः गथे जिल अथे यानाः थ्व अधिवेशनयात देश व जनताया हीतय् छ्यलेमाःगु खनेदु। अथे धइगु छुं ईया लागिं पार तरे जूगु न्हूम्ह प्रधानमन्त्री ल्ययेगु ज्या थ्व विशेष अधिवेशन अवधि दुने हे पूवंकेमाः। छाय्धाःसा थ्व उगु हे प्रयोजनया लागिं सःतूगु विशेष अधिवेशन खः। विशेष अधिवेशनय् खास यानाः छु प्रयोजनया लागिं सःतूगु खः, मूल रुपं उगु हे प्रयोजनय् जक सहलह याये दइगु व विषयवस्तुइ सहलह व निर्णय क्वचायेवं उगु विशेष अधिवेशन हे क्वचाःगु घोषणा तकं जुइगुलिं यानाः नं थुगु बैठकय् मेमेगु विषय स्वयां आः न्ह्यःने वयाच्वंगु प्रस्तावय् ध्यान केन्द्रित जुइमाःगु खनेदु ।

समावेदन दर्ता याःगु न्हय्गू राजनीतिक दलतय्सं वंगु मंसीर ३ गते व्यवस्थापिका संसद अधिवेशनया अन्य जूगुलिं न्हूम्ह प्रधानमन्त्री ल्ययेगु लागिं राष्ट्रिय सहमतियात प्राथमिकता बियाः संविधानसभा कार्यसञ्चालन नियमावली २०६५ या नियम बमोजिम प्रधानमन्त्री निर्वाचनया न्हूगु प्रक्रिया शुरु यायेमाः धकाः प्रस्ताव दर्ता याःगु खः। तर आः तक नं थीथी राजनीतिक दलतय् दथुइ राष्ट्रिय सहमति धाःसा जुइफुगु मदुनि। राष्ट्रिय सहमतिया लागिं राजनीतिक दलतय् दथुइ थीथी कथंया वार्ता, कालबिल व दाउपेच धाःसा जारी हे जुयाच्वंगु दनि। छखे छम्हयां छम्ह जक ल्यं दनिम्ह प्रधानमन्त्रीया उम्मेदवार नेपाली कांग्रेसया नेता रामचन्द्र पौडेलयात हे माओवादीं समर्थन यानाः प्रधानमन्त्री दयेकेगु खँ न्ह्यःने वयाच्वंगु दुसा मेखे रोटेशन प्रणाली अन्तर्गत फुक्कं दलया नेतातय्त पालंपाः प्रधानमन्त्री दयेकेगु प्रस्ताव नं न्ह्यःने वयाच्वंगु दु। हाकनं थ्व अपरिपक्व प्रस्ताव जुल धकाः सत्तारुढ एमालेया अध्यक्षयात तुं प्रधानमन्त्री दयेकाः माधवया थासय् झलनाथ जक हयाः चित्त बुझे याकेगु कथंया थीथी प्रस्ताव नं न्ह्यःने वयाच्वंगु दु। थ्व फुक्कं प्रस्तावतय् दथुइ निर्वाचन यायेगु वा सहमतिया आधारय् हे जक प्रधानमन्त्री ल्ययेगु धइगु मेगु विवाद नं यथावत दनि ।

थथे थीथी विवाद व अन्यौलत कायम जुइकं जुइकं व्यवस्थापिका संसदया विशेष अधिवेशन सःतूगुलिं आः राजनीतिक नेतातय् ई जक मखु कि ६०१ म्ह सभासद्तय् ई नं अथें छुं उपलब्धी चूमलाकं फुइगु खःला धकाः नं शंका जुयावःगु दु। गबलें सदन चले याके मबीगु, गबलें सदनय् बजेट प्रस्तुत याके मबीगु व गबलें सुयातं हातपात तकं यानाः सदनया गरिमा हे क्वह्यंकेगु ज्या यानाच्वंपिं एकीकृत माओवादीं आःया सदन नं थःपिंसं यत्थें याये दुसा सहज रुपं चले याकेगु, मखुत धाःसा छुं नं निर्णय याके मबीगु कथं नं उपयोगया कुतः यायेफु। उकिं न्हापां राजनीतिक दलतय् दथुइ सैद्धान्तिक सहमति याकाःलि हे जक सदनय् प्रस्तावय् सहलह यायेगु वा मतदान यायेगु पाय्छि जुइ। अले जक विशेष अधिवेशनं उपलब्धी हासिल याये फइगु खनेदु। मखुत धाःसा बलजफ्ती यायेगु, प्रस्ताव स्वयां मेमेगु ज्याखँय् अप्वः ई फ्यायेगु आदि इत्यादि म्वाः मदुगु ज्याय् सदनया ई अप्वः वनेफु। पुस ४ गते शुरु जूगु बैठक आः पुस ८ गते न्हिनय् १ बजे तकया लागिं स्थगन जूगु दु। आः पुस ८ गते तकया दुने राजनीतिक पार्टीतय् दथुइ थीथी बुँदाय् सहमति जुयाः सदन चले जुइवं सहज रुपं अज्याःगु हे विषयवस्तुइ सहलह ब्याके दुसा थ्व विशेष अधिवेशन उपलब्धीपूर्ण नं जूवनेफु। अथे जुयाः आः हथासं सःतेधुंकूगु बैठकयात नं फयांफछि उपलब्धीपूर्ण यायेगु ज्याय् थीथी राजनीतिक पार्टीतय्गु ध्यान वनेमाः ।

नेपाःया संसदीय इतिहासय् हे मंसीर ३ गते छगू दर्भाग्यपूर्ण घटना जूगु न्हि खः। यदि सहमति व सहकार्ययात स्वयां बलमिचाइँ व जबर्जस्ती यायेगु परम्परायात हे ध्यान बिल धाःसा मेगु थप अज्याःगु घटना मजुइ नं धाये फइ मखु। अथे जुयाः नं नियमित बैठक व नियमित अधिवेशन स्वयां विशेष अधिवेशनया अलग्ग हे महत्व दइगु जुयाः नं थ्व इलय् सम्पूर्ण सभासदत नापं
राजनीतिक दलया नेतात उलि हे चतुर जुइमाःगु खनेदु। कार्यव्यवस्था परामर्श समितिया बैठकं हे थुगु विशेष अधिवेशन प्रधानमन्त्री चयनया लागिं न्हूगु प्रक्रिया शुरु यायेगु प्रस्तावय् केन्द्रित जुइगु सहमति जुइधुंकूगु जुयाः नं आः च्वनीगु बैठकय् प्रस्तावया विषयय् व्यापक सहलह यानाः न्हूगु कथं प्रधानमन्त्री ल्ययेगु ज्या याना वनीगु विश्वास यायेछिं। ताः ई तक देशय् न्हूम्ह प्रधानमन्त्री मदयेका च्वनेमाःगु अन्यौलया स्थिति व न्हूगु सरकार मदयेकं देशयात अस्थिर यानाः मछिं मचा जुइका तयेगु स्वयां इलय् समस्याया समाधान यायेत स्वयेगु सकसियां भिं जुइ। राजनीतिक दलतय्सं विशेष अधिवेशनयात थुकथं हे उपयोग याइगु आशा याये ।

More Stories Like this