राज्य पुनर्संरचना बारे हानं सहलह छाय्?

संविधानसभाया राज्य पुनर्संरचना तथा स्रोत बाँडफाँड समितिपाखें राज्य पुनर्संरचनाया विषयय् प्रतिवेदन हे तयार यानाः बुझे यायेधुंकाः आः वयाः हानं थुकिया बारे विज्ञतय्गु बिचाः कायेगु धकाः अन्तर्क्रिया ज्याझ्वःत न्ह्याकाच्वंगु दु। राज्य पुनर्संरचना बारे प्रतिवेदन तयार यानाः संविधानसभायात लःल्हाये धुंकाः क्वचायेधुंकूगु विषययात कयाः थथे सहलह यायेगुया अर्थ छु खः धइगु न्ह्यसः पिहां वइगु स्वाभाविक खः ।

संविधानसभां निर्णय याये मफयाः थाति लानाच्वंगु विषयत अझ यक्व दनि। उपिं विषयया विज्ञतय्गु बिचाः कायेगु आवश्यकता आः तक महसुस मजूनि, ज्या क्वचायेकाः प्रतिवेदन हे लःल्हायेधुंकूगु विषययात कयाः हानं विज्ञतय्गु बिचाः कायेमाःगु आवश्यकता छाय् जुल? राज्य पुनर्संरचना समितिपाखें थःपिनि प्रतिवेदन सिधयेकाः लःल्हायेवं हे उगु प्रतिवेदन विरुद्ध ब्रम्हूवादीतय्सं थीथी कथंया षडयन्त्र शुरु याना हःगु खः। प्रतिवेदनय् जातीय व सामर्थ्यया आधारय् प्रदेशत दयेकेगु धासें १४ गू प्रदेशया प्रस्ताव नं याना तःगु खः। प्रतिवेदनय् न्ह्यथना तःगु नक्सा, आधार आदि खँय् यक्व कथंया विवाद मदुगु मखु। तर उकिया सैद्धान्तिक आधारयात हे हाथ्या बीगु ज्या धाःसा ब्रम्हूवादीतय्सं हे जक यानाच्वंगु खः। माओवादीया द्वपं ला थ्व नं दु कि राज्य पुनर्संरचना समितिं उगु प्रतिवेदन लःल्हाये धुनेवं हे एमाले व कांग्रेसं संविधानसभाया बैठक तकं चले यायेगु बन्द याःगु खः। उकिं थुकिया लिउने अनेक षडयन्त्र जुयाच्वंगु खँ प्रस्ट दु। समितिं आः थःगु प्रतिवेदनय् सामान्य सुधार यायेगु बाहेक उकियात पूवंक हीके फइगु छुं हे आधार मदु। यदि हीकल धाःसा उकिया लिच्वः बांलाः मजुइगु खँय् सचेत जुइमाः ।

More Stories Like this