सेनापति तुरुन्त लिमकाइगु
सुद नापलायेधुंकाः प्रचण्डया भाय् हिल
प्रधानसेनापति रुक्मांगद कटवालयात चीकेगु मामिलाय् पिहां वःगु विवाद तच्वया वनाः अन्ततः प्रधानमन्त्री पुष्पकमल दाहाल 'प्रचण्डं' राजीनामा हे बीगु धइगु तकया स्थिति वयेधुंकूगु खःसां थौं सुथय् आकाझाकां जूगु भारतीय राजदूत राकेश सुदलिसेया भेटवार्ता लिपा प्रम प्रचण्डया 'टोन' छुं भचा परिवर्तन जूगु खँ विज्ञ सूत्रं धाःगु दु ।
थौं सुथय् वय्कःयात भारतीय राजदूत सुद नापं 'र'या मनू धयातःम्ह सभासद् अमरेशकुमार सिंहं नापलाःगु खः । उगु इलय् वय्कःपिनि दथुइ छु खँ जुल धइगु ला सी मदुनि तर उगु नापलायेज्या लिपा प्रम प्रचण्डया आक्रोशपूर्ण भाषाय् हिउपाः वःगु दावी सूत्रं याःगु दु । सूत्रया कथं प्रम प्रचण्ड आः प्रधानसेनापति कटवालयात तुरुन्त हे बर्खास्त यायेगु व याये मफुसा थम्हं जूसां राजीनामा बी धइगु पुलांगु अडानपाखें छुं भचा लिचिलीगु सम्भावना दु ।
सूत्रया कथं प्रधानसेनापतियात चीके मफुत धाःसा थःपिंसं जूसां सरकार त्वःतेगु धइगु मनःस्थितिइ माओवादी बांलाक हे थ्यनेधुंकूगु खः । यदि अज्याःगु हे स्थिति वल धाःसा थौं खुलामाचय् जुइगु मजदूर दिवसया सभां हे प्रधानमन्त्री एवं माओवादी अध्यक्ष प्रचण्डं सरकार त्वःतागु जुल धकाः सार्वजनिक घोषणा यायेगु तयारी जुयाच्वंगु खः । थौं सुथय्या भेटघाट लिपा थज्याःगु घोषणाया सम्भावना छुं भचा लिहां वंगु खँ सूत्रं धाःगु दु ।
प्रधानमन्त्री प्रचण्डयात भारतीय राजदूतं छु खँ धयाः 'कन्भिन्स' यात धइगु सी मदुसां भारतं सुपुर्दगी सन्धि सम्बन्धी खँ न्ह्यःने तये हःगु अनुमान सूत्रं याःगु दु । भारतं थ्व सन्धि यायेमाल धकाः माग यानाच्वंगु खःसां नेपालं धाःसा आलटाल यानाः मयासे च्वनाच्वंगु खः ।
माओवादी अझं आतंकवादी धलखय्
नेकपा माओवादी जनयुद्ध त्वःताः सरकारय् वने धुंकूसां नं थ्व पार्टी अमेरिकाया आतंकवादी धलखय् धाःसा आः तकं कायम हे जुयाच्वंगु खँ अमेरिकां धाःगु दु । वंगु चान्हय् अमेरिकी विदेश मन्त्रालयं जारी याःगु आतंकवादी संगठनतय् धलखय् माओवादीया नां अझं कायम जुयाच्वंगु खः । माओवादी सरकारय् वंसां थुकिया भातृ संगठनतय् गतिविधि धाःसा आतंकपूर्ण जुयाच्वंगु दु धासें मन्त्रालयं उकी दुःख नं प्वंकूगु दु । माओवादी सत्तारुढ जुइधुंकाः वया भातृ संगठनतय् थज्याःगु गतिविधिइ नाटकीय रुपं वृद्धि जुयाच्वंगु खँ नं उकी धयातःगु दु । अमेरिकां माओवादीया गतिविधि स्वयाः जक थुकियात आतंकवादी धलखं चीकेगु खँ धया वयाच्वंगु खः ।
