हुल दंगालिपा विपक्षी नेतात ज्वन

बेलारुस (एपी)

आइतबाः क्वचाःगु राष्ट्रपतीय महानिर्वाचनय् हाकनं त्याम्ह वर्तमान राष्ट्रपति अलेकज्यान्डर लुकासेन्कोया विरोधय् द्वलंद्वः प्रर्दशनकारी सतकय् कुहाँवःगु दु । झिखुदँतक्क निरन्तर बेलारुसया सत्ताय् च्वनादीम्ह शक्तिशाली राष्ट्रपितं थुगुसीया निर्वाचनय् तसकं धाँधली याना जाली मतपत्रया माध्यमपाखें त्याकूगु द्वपनय् प्रमुख सरकारी ज्याकू घेराउ यानाच्वंपि द्वलंद्वः प्रदर्शनकारीतय्त दंगा प्रहरीं निर्ममतापूर्वक कत्थि छ्यलाः बिसिके छ्वःगु जानकारी ब्यूगु दु । सोभियत सङ्घपाखें पिहाँवयाः न्हूगु राष्ट्रयारुपं उदय जूगु बेलारुस रुस व पश्चिमी राष्ट्रतय्गु दथुइ तटस्थ राष्ट्र धकाः म्हस्यू ।

छक्वःपतिकं झिखुदँतक्क सत्ताय् दुम्ह वर्तमान राष्ट्रपति लुकासेन्कोयात वय्कःया कडा शासन व हिउपाःप्रति ध्यान मबीगु चेष्टां यानाः पश्चिमा राष्ट्रत वय्कःलिसे सन्तुष्ट मदु । हिउपाः प्रेमि जनतातय्सं राष्ट्रपतिया निर्वाचन परिणाम घोषणा जुइवं न्ह्याकूगु आन्दोलन मत्थर यायेत सरकारं स्वम्ह प्रमुख प्रतिपक्षी नेतातय्त ज्वनाः नियन्त्रणय् काःगु दु । उपि मध्ये अस्पतालय् उपचारार्थ वृद्ध नेता भ्यादिमिर नेकल्याएभयात नं जबरजस्ती सादा पोशाकया प्रहरीं अस्पतालपाखें हे ज्वनाः यंकूगु खः । देय्या पेशागत बुद्धिजीवीत लिसे मेमेपि सामान्य नागरिक नापं विपक्षी नेताया गिरफ्तारीप्रति आक्रोशित जूगुलि आन्दोलन तच्वइगु धुकुमाः यानातःगु दु ।

More Stories Like this