खनालयात नं प्रधानमन्त्री मानय् यायेफु - देव गुरुङं
येँ (झीगु स्वनिगः)
एकीकृत ने क पा माओवादीया स्थायी समिति दुजः देव गुरुङं एमाले नायः झलनाथ खनालयात न्हूम्ह प्रधानमन्त्रीया रुपं स्वीकार यायेफइगु धयादिल । रिपोर्टस क्लबपाखें याःगु साक्षात्कार ज्याभुवलय् न्ववानादिसें माओवादी नेता गुरुङं एमाले नेतृत्व स्वीकार यायेगु पार्टीया पुलांगु अडान कायम जुइगु संकेत याःगु दु । तःधंगु पार्टीया नातां नेतृत्वया न्हापांगु दाबी माओवादीया जूसां नं माओवादी नेतृत्वयात मेपिसं ग्वाहालि यायेमफइगु अवस्था वःसा पार्टीं एमाले नायः खनालयात स्वीकार यायेफइगु गुरुङं स्पष्ट यानादिल । न्हूगु सरकारया आवश्यकता महशूस यानाः माओवादीं संसदया विशेष अधिवेशनया इनाप याःगु धयादीम्ह वय्कलं रामचन्द्र पौडेलया उम्मेदवारी धाःसा खारेज जुइधुंकूगु स्पष्ट नापं यानादिल ।
कांग्रेस नेता अर्जुन नरिसंह केसीं धाःसा पौडेलयाविरुद्ध स्वसः व छगू मत महतले वय्कःया उम्मेदवारी कायम दइगु बिचाः तयादिल । केसीं कांग्रेसं प्रधानमन्त्री निर्वाचनया न्हूगु प्रकृया न्ह्याःसा पौडेलया विकल्प बिइफइगु धयादिल । एमाले छ्यान्जे युवराज ज्ञवालीं धाःसा रामचन्द्र पौडेलया उम्मेदवारी खारेज यानाः मेगु न्ह्याम्हसिया नं नेतृत्वयात नं स्वीकार यायेफइगु बिचाः तयादिल ।
