पर्यटन दँ वःसां नं पशुपतिदुने उलि हे फोहर

येँ (झीगु स्वनिगः)

पर्यटन दँ सन् २०११ न्ह्यायेत छुं दि जक ल्यं दनीबलय् नेपाःया हे प्रमुख धार्मिक पर्यटनस्थल पशुपति क्षेत्र धाःसा फोहरया कारण कुरुप खनेदुगु दु । ताःहाकःगु इलंनिसें पशुपति क्षेत्र परिसरय् द्वःचिनाच्वंगु फोहरया कारण उगु क्षेत्र दुर्गन्धित जुइगुया लिसलिसे कुरुप खनेदुगु खः ।
पर्यटन दँयात ध्यानय् तयाः सरसफाइ लगायतया विकासया ज्या यायेमाःगुलिइ झन् पर्यटन दँ न्ह्यायेधुंकाः नं अझ सरसफाइया अवस्थाय् सुधार जुइगु छाँटकाँट पशुपति क्षेत्र विकास कोषं क्यंगु मदुनी । दँया हे दकले अप्वः फोहर जुइगु पर्वया रुपं दुगु बालाचतुर्दशीइ पशुपति परिसर तसकं फोहर जुइगु यानाच्वंगु तर थुकियात व्यवस्थित यायेमफइगु धासें फोहर जुइधुंकाः नं सरसफाइ जुइत अझ छुं ई बिइगु कोषया दुजः छ्यान्जे सुशील नाहटां धयादिल । दच्छियंक मदुपि थःथितिपिनिगु लुमन्तिइ सत्बिज ह्वलेगु ज्या यायेगु निति स्वनिगः पिनेयाःपि नापं करिब निगू लाख भक्तजन पशुपति क्षेत्रय् वयेगु यानाच्वंगु दु । पर्वया लसताय् जुइगु फोहरमैलायात ध्यानय् तयाः कोषं पशुपति क्षेत्रय् प्यंगू शौचालयया व्यवस्था याःगु जूसां नं शौचालयया छ्यलाः धाःसा उचित मात्राय् जूगु खनेमदु । छन्हु जक च्वनेगु जूसां नं निगू लाख मनुखं न्ह्यःनेलाःथे फोहर यानाः बिइगु जूगुलि अनया सरसफाइया निति नगरपालिकां सच्छिम्ह कामदार पशुपति क्षेत्रय् छ्यलाःतःगु खः । तर नं उगु क्षेत्रया फोहर व्यवस्थित जुइमफुत । कैलाशडाँडाय् वंगु खुदँनिसें हासा व्यापार यानाः च्वनाच्वंम्ह निर्मला मगरयाकथं उगु क्षेत्रय् असारनिसें हे सरसफाइ जूगु मदुनि । थीथी इलय् सप्ताह लिसे महायज्ञ यायेगु थाय्यारुपं दुगु कैलाशडाँडाय् असारनिसें हे सरसफाइ जूगु मदुनि ।
कैलाशडाँडा क्षेत्रय् थुकथं हासा व्यापार याइपिनिगु ल्या झिगू दु । उपि न्हिच्छि व्यापार यायेगु व सनिलय् जुइवं उगु क्षेत्रय् जूगु फोहरयात सफा यायेगु ज्या नापं यायेगु यानाच्वंगु दाबी मेम्ह हासा व्यापारी सुमन तामाङया दु । तर बालाचतुर्दशी लिसे थीथी यलय् जुइगु धार्मिक ज्याया निति कोषं धेबा काइसा उकियापाखें फोहर सफा यायेगु नं कोषया हे जिम्मेवारी जूगु धासें थौंकन्हय् थःपिसं सरसफाइ यायेगु हे त्वःताःगु उम्ह व्यापारीं जानकारी बियादिल ।

यक्वः ईलिपा थः पासापिलिसे छुं ई दुःख सुखया खँ ल्हानाः ई छ्यायेगु बिचारं कैलाशडाँडाय् वःम्ह कल्पना गुरुङ फोहर खनाः हे अनं च्वनेमफुत । थ्व समस्या कैलाशडाँडाया जक मजुसे पशुपति परिसरदुने दुगु राममन्दिर लगायतया थासय् नं दु । थुकियापाखें दर्शनार्थीया लिसलिसे दृश्यावलोकनया निति वःपि मनूत नापं न्हाय् त्वःपुइत बाध्य जुइगु यानाच्वंगु दु । नकतिनि विदेशपाखें नेपाः लिहाँवःम्ह दोलखा निवासी मानबहादुर दर्लामीं नेपाः वयेधुंकाः पशुपतिया दर्शन यानाः जक छेँय् वनेधइगु बिचाः ज्वनाः वःगु तर थनया फोहर खनाः दिक्क जूगु धयादिल । नेपाःयात विदेशलिसे लनेगु लाः फइमखु तर छुं मात्राय् जूसां नं सफा जुइ धइगु बिचाः यानाःगु खः तर धार्मिक तीर्थस्थल उकिसनं पशुपति थेंज्याःगु क्षेत्र नापं फोहर जूगु खनाः तसकं म्हाइपुस्से च्वंगु दु वय्कलं धयादिल । नेपालं पर्यटन दँ हनेगु धकाः घोषणा ला यात तर थनया फोहरमैला खनाः छु नं ठोस योजना हे मदयेकूसे घोषणा याःथें महशूस जुल जितः । पर्यटकत मन्दिर स्वयाः नं बागमती स्वयेत वइगु धासें थःगु जिम्मेवारी बागमती सफा यायेगु ज्या मखु धासें सरसफाइया विषयपाखें कोषया दुजः छ्यान्जे नाहटा लिचिलादिल । कोषं सरसफाइया निति धकाः ब्यागलं बजेट मफ्याःगु व विशेष कार्ययोजना नं मदयेकूगु व नियमित ज्या अन्तर्गत बुलुहुँ सरसफाइ यायेगु धइगु झारा टारय् यायेगु नीति व कार्यशैलीं पशुपति क्षेत्र अपेक्षितरुपं सफा खनेदयेकेत गुलि ई बिइगु खँ धायेत तसकं थाकुनि ।

More Stories Like this