विशेष अधिवेशनं निकासया आशा

- रुपा महर्जन -

एकीकृत नेकपा माओवादी व न्हय्गू दलया गठबन्धन जानाः मुक्कं यानाः च्यागू दलया सांसदतय्सं तयादीगु समावेदनयात कयाः इनाप यानातःगु व्यवस्थापिका संसदया विशेष अधिवेशनं आइतवाःनिसें न्ह्याःगु दु । एकीकृत नेकपा माओवादी नापं खुगू दलया सच्छि व ८७ सभासद् संसदया विशेष अधिवेशन सःतेगु निति समावेदन याःगु कथं वंगु आइतवाः राष्ट्रपितं विशेष अधिवेशन इनाप याःगु खः । न्हू बानेश्वरया संविधानसभाया भवनय् जूगु विशेष अधिवेशनया न्हापांगु दिनय् राष्ट्रपति डा. रामवरण यादवं छ्वयाहःगु पौ ब्वनाः सभामुख सुवास चन्द्र नेम्वाङं न्यंकादी धुंकल । माओवादी व न्हय्गू दलया गठबन्धनं आःया अवस्थाय् प्रधानमन्त्री उम्मेदवारीया औचित्य समाप्त जुइधुंकूगु जुयाः आः संसदया निर्वाचन सम्वन्धि नियमावली संशोधन यानाः न्हूगु हे प्रकि्रयाकथं प्रधानमन्त्री ल्ययेगु ज्या न्ह्याकेमाः धकाः प्रस्ताव तयातःगु दु ।
खला व्यवस्थापिका संसदया मुँज्या च्वने न्ह्यः संसदया कार्यव्यवस्था नापं परामर्श समितिया मुँज्या च्वंगु खः । उगु मुँज्यां आइतवाःया व्यवस्थापिका संसदया मुँज्यायात औपचारिकता जक बिइगु नापं राष्ट्रपतिया पौ ब्वना न्यंकाः मेगु मुँज्याया तिथि घोषणा यायेगु धकाः सहमति जूगु खः । अथे समितिइ जूगु सहमति कथं हे संसदया मुँज्या न्ह्याःगु खः । संसदया कार्यव्यवस्था परामर्श समितिया मुँज्या च्वनेन्ह्यः एकीकृत माओवादी नेपाली कांग्रेस व एमालेया शीर्ष नेतातय्गु दथुइ सिहदरवारय् मुँज्या जूगु खः । उगु मुँज्याय् सहमतिया निति वइगु पुस ८ गते तक कुतः यायेगु अनंलिपा नं सहमति मजुल धाःसा संसदय् प्रस्तावयात कयाः चुनावय् वनेगु धकाः खँ जूगु खः । एकीकृत माओवादी नापं मेगु दलं संसदया विशेष अधिवेशन आव्हान नापनापं संसद्या चालु अधिवेशनया अन्त्य जूगु धासें कांग्रेसं संसदीय दलया नेता रामचन्द्रया उम्मेदवारी नं समाप्त जूगु धासें सरकार गठन संसद नियमावलीइ परिमार्जन लगायतया विषयलय् सहलह यायेत विशेष अधिवेशनया माःग याःगु खः । संवैधानिक ब्यवस्था कथं सदन न्ह्योने मवंगु इलय् छगू ब्व सभासद्तय्सं अधिवेशनया निति समावेदन यायेवं राष्ट्रपितं विशेष अधिवेशन सःतेमाःगु प्रावधान दु । माओवादीं संसद अधिवेशनया अन्त्य नापनापं प्रधानमन्त्रीया छम्ह जक उम्मेदवार रामचन्द्र पौडेलया उम्मेदवारी स्वतः समाप्त जुइगु जुइवं विशेष अधिवेशनं नियमावली संशोधन यानाः निर्वाचनयात न्हूगु कथं न्ह्योने यंकेगु निर्णय मेगु ग्वाहालि यानाच्वंगु दलतय्सं याःगु खः ।

थुखे सत्तारुढ कांग्रेसं धाःसा थःगु दलया नेता रामचन्द्र पौडलया उम्मेदवारीयात तयेगु निति विशेष अधिवेशनय् प्रस्तुत जुइगु माओवादीया प्रस्ताव विफल यायेगु कुतः जुयाच्वंगु दु । सहमति मजूतल्ले अधिवेशन मसःतेगु अडानय् च्वंगु कामचलाऊ सरकारया प्रधानमन्त्रीं विशेष अधिवेशनयात असफल यायेत नियमित अधिवेशनया निितं हथाय् चायाः च्वंगु दु । प्रधानमन्त्री नेपाल लगायत छगू पुचः नेतातय्सं कांग्रेस संसदीय दलया नेता रामचन्द्र पौडलया उम्मेदवारीयात हे निरन्तरता बिइमाःगु व वय्कःयात प्रधानमन्त्री ल्ययेत ग्वाहालि यायेमाःगु बिचाः तयाः वयाच्वंगु खः । थज्याःगु बिचाः धइगु कुसर् या सुरक्षा यायेगु बाहेक मेगु छु नं जुइफइमखु । विशेष अधिवेशन मसःतेत राष्ट्रपतिदथुइ निवेदन याम्ह नेपालं अधिवेशन इनापलिपा राष्ट्रपतिनापया सम्बन्ध नं तापाःगु खनेदु । कांग्रेसनापं समावेदनया प्रस्तावयात असफल यायेगु कुतः यानाच्वंगु व एमालें थःगु तटस्थताया अडानयात त्वःताः बहुमतया विकल्प खुल्ला तयेगु निर्णयलय् थ्यंगु दु । सहमतीय सरकारया खँयात छखे तयाः एमालें सहमतीय वा बहुमतीय छु पाखें वनेगु धइगु खँ आः तक्कं ठोस मयासें रामचन्द्रया उम्मेदवारी फिर्तालिपा जक याइगु धासें पौड्यालया उम्मेदवारी लित बिइमाःगु खँय् बहः ब्यूगु दु । थौं देय् तसकं ठाकुगु व ज्यामिछंगु अवस्थां न्ह्योने वनाच्वंगु दु । जनतां सरकार विहीनताया अनुभूति खुलाया ई छ्वये धुंकल । चालु सदनया अन्त्य नापनापं प्रधानमन्त्रीया निर्वाचन प्रकि्रया नं स्वतः अन्त्य जुइधुंकूगु अवस्थां सरकार नीस्वनेगु वा न्हूगु विधि व प्रकि्रयायात याकनं न्ह्योने यंकेमाःगु तसकं आवश्यक जुइधुंकूगु दु । सत्ता स्वार्थया कारण कांग्रेसं थःगु पुलांगु अडानय् हे च्वनाः च्वनेगु खःसा देशय् च्वंगु अग्रगामी एजेण्डात फुक्क भताभुंगया अवस्थाय् लाइगु निश्चित हे खः । संविधानया माग कथं याःगु विषययात न्हापां छगू टुङ्गोय् थ्यंकेगु जिम्मेवारी खः । धात्थें हे संसदीय पद्धतिया सच्चा अनुयायी धाईपंसं अधिवेशनया मागय् ग्वाहालि यायेगु पाखें वनेमाः । सुनां नं इगोया तरिकां वनाः असफलताय् यंकेगुपाखे वन धाःसा समाधानया थासय् अझ अप्वः समस्या ब्वलंकीगु निश्चित जुइ । दलतय्सं देशय् विद्यमान जटिलतायात तच्वकेगु मखु बरु झन् गतिरोधयात ज्यंकेगु पाखे वनाः निर्णय यायेफयेमाः । जनताया इच्छा नं थ्वहे खः । एमालें रामचन्द्रया उम्मेदवारी फिर्ताया माग नापं न्हूगु प्रकि्रयाया थालनीया पक्षय् दंगु खःसा माओवादीया समावेदन प्रस्तावयात असफल यायेगु कुतःया छु नं अर्थ दइमखु ।

चालु सदनया अन्त्य नापनापं प्रकि्रयागतकथं पौडेलया उम्मेदवारीया अन्त्य जुइधुंकाः नं उम्मेदवारी जारी जुइगु वा मजुइगु वा वय्कःयात समर्थन यायेगु वा मयायेगु धइगु थेंज्याःगु प्राविधिक विषयलय् सत्ता पक्ष दलत अल्मलय् जुइगु धइगु तसकं विडम्बनाया खँ खः । बरु उकिया पलेसा थ्व विशेष अधिवेशनपाखें पौडेलया उम्मेदवारी प्रस्ताव रद्द यानाः नियमावली हिलाः कांगे्रसं पौडेलयात हे हाकनं न्हूगु कथं ल्ह्वने फइगु वा मेपि हे सुं उम्मेदवारीया पक्षय् मत बिइफइ धकाः पियाः च्वनेगु पलेसा न्हूगु बिचाःकथं न्ह्यःने वनेमाः । दलतय्सं न्हूगु प्रकि्रया मालेगुपाखे वन धाःसा जक देय्यात अनिर्णयया बन्दीं पिने पिकाये फइ । अथे जुयाः संसद् नियमावली संशोधन यानाः न्हूगु कथं प्रधानमन्त्री ल्ययेगु प्रकि्रयाय् वनेगु पलेसा मेगु निकासाया विकल्प तत्कालया निति खनेमदु । थःथःगु दलगत स्वार्थयात इगो दयेकाः टक्कर कयाः च्वनेगु तसकं गलत खँ खः । फुक्कया सकारात्मक पक्षया प्रस्तावतय्त असफल दयेकेगु रणनीतिइ वनेगु पाखें न्ह्यःने वन धाःसा उगु देय्या राजनीतिक प्रकि्रयाया निति प्रत्युत्पादक जू वनी । देय् गबले गतिरोधया भासं पिने वने फइमखु । उकि थ्व विशेष अधिवेशनं न्हूगु राजनीतिक निकासया लँ ज्वनेमाः धइगु आशा झीसं याये ।

More Stories Like this