रुवेल लिसें सुजाता नं जालसाजी धन्दाय्

पारसया गोलिकाण्डं न्ह्यःने वःम्ह उपप्रधान व परराष्ट्रमन्त्री सुजाता कोइरालाजोस्तया जिलाजं रुवेल चौधरीया दर्जनौ अपराधिक व जालसाजी धन्दात सतहलय् वयेवं थीथी जालसाजी धन्दाय् चौधरीय् ससःमां खुद सुजाता कोइराला नापं सलग्नता दुगु खँ पिहां वःगु दु । खुँया पासा खुँ हे जुइथें अपराधिक पृष्ठभूमिया रुबेल चौधरीया थीथी जालसाजी धन्दाय् सुजाता थःनं तक्यना च्वंगु घटनां उपप्रधान व परराष्ट्रमन्त्री थें गरीमामयी पदय् च्वनाः गुलित बांमलाःगु ज्याय् कोइराला व्यस्त जुयाच्वन धयागु खँ सर्वसाधारण नेपाःमि जनता अजूचाःगु दु । रुवेल चौधरीया अवैधानिक धन्दाय् कलबाइपास अवैध थीथी संघ संस्थाय् लगानी नेपाल प्रहरीया डाफेर एपीसी ठेक्काकाण्ड अवैध पासपोर्ट कारवार एभरेष्ट होटलय् लगानी क्यासिनो रोयलय् लगानी वर्क परमिट विना नेपालय् च्वनाः ज्या यानाच्वंगु लगायत डर्जनौं अवैध ज्याखँ यानाच्वंगु दु । थुकीमध्ये गुलिखँय् अवैध कारोवारय् सुजाता थःनं संलग्नता दुगु कारणं प्रहरी व गुप्तचरतय्गु कयौं सुचंया आधारय् खँ च्वय् थ्यंसां कारवाही धाःसा गनं सुनांहे न्ह्याकेगू आँट यायेमफु । कलपासया खँय् नं प्रहरीं सुजाताया छेँ तक्क पत्ता लगय् याःसां छापा मारे यायेमफयाः लिहां वःगु व छुं न्हिलिपा सुजाताया छेँय् वनाः चेक जाँचया दौरानय् छुंछुं प्रमाणत मदुगु खः । छेँ पत्ता लगय् जूवलय् हे सुजाताया छेँय् छापामारे याःगु खःसा कलपास यायेत छ्यलावयाच्वंगु सामानत ज्वनेफैगु खः । तर पद प्रतिस्था व शक्तिया लिधँसाय् सुजातां उगु काण्डं थः व थः जिलाजंयात बचय् यायेत ताःलाःसां उगु घटनानाप स्वाःपि निम्ह बंगलादेशया नागरिकता धाःसा प्रहरीया कब्जाय् दु । ईपि निम्हय्स्यां रुवेल चौधरी थःपिन्त ज्या याकातःगु धाःसां कारवाही धाःसा जूगु मदुनि ।

संयुक्त राष्ट्रसंघयाहे ध्यान सालाकाःगु सुडानया ठेक्कापत्ताय् रुबेल चौधरीं छम्ह नेपाली नागरिक यात न्ह्यःने तया ५० करोड लागतया ठेक्काय् २५ औं करोडया घोटाला याःगु दु । अथ्यहे संयुक्त राष्ट्र संघया ध्यान मालाकाःगु मेगु अवैधधन्दा धयागु रुबेल चौधरीया वल्र्ड पिस एण्ड इकोनोमिक डेभलपमेन्ट अर्गनाइजेशन नांया संस्था खः । थुगु संस्थाया वेभसाइट व लेटर पाय्दय् रुबेल चौधरी व सुजाता कोइराला निम्हस्यां नं थःपिन्त डाक्टर धकाः सम्वोधन यानावःगु दु । थुगुकथं सम्वोधन यानावःगुया कारण छु खः धयागु खँय् न्ह्यसः थनाच्वंगु दु । उलिजक मखु उगु संस्थाया लेटर पाय्दय् संयुक्त राष्ट्रसंघया लोगो नापं छ्यलातःगु दु । थथ्य राष्ट्रसंघया लोगो छ्यलेगु अधिकार सुइतं मदु । थ्व कानूनत अपराध खः । थ्व संस्था बंगलादेशय् गैरसरकारी संस्थाकथं दर्ता यानातःगु धाःसां राष्ट्रसंघया लोगो छ्यला गैरकानूनी ज्या याःगु खँय् राष्ट्रसंघ नं थुमित कानूनया कठघराय् थनेहयेफु । संस्थाया ब्रोसरय् नं उगु लोगो छ्यलातःगु दु । राष्ट्रसंघया लोगो धयागु संघया कार्यालय व एजेन्सी जक छ्यलेगु याइ व थुमिसं वाहेक मेपिन्त छ्यलेगु अधिकार मदु । यदि संयुक्त राष्ट्रसंघ थुगु खँयात ल्होना कानूनी प्रकृया न्ह्याकल धाःसा रुबेल चौधरी थः कलाः मेलानी रोजा चौधरी वर्तमान नायः अमुद्र राना चौधरी व खुद उपप्रधान व परराष्ट्रमन्त्री सुजाता कोइराला जोस्त नं अन्तराष्ट्रिय न्यायालयया कठघराय् दनेमालीगु निश्चित खनेदु ।

More Stories Like this