कार्यदलया म्याद थप मजुल

येँ (झीगु स्वनिगः)

संविधान निर्माणया झ्वलय् विवाद जूगु विषययात ज्यंकेगु निति धकाः नीस्वंगु उच्च स्तरीय राजनीतिक कार्यदलया म्याद थप मयाये धकाः २७ दलया दथुइ सहमति जूगु दु । म्हिगः सोमवाः च्वंगु २७ दलया मुँज्याय् अथे सहमति जूगु खः । न्हूगु संविधान निर्माणया झ्वलय् विवाद जुयाच्वंगु विषय आः संविधानसभा व संवैधानिक समितिपाखें सहमति मालेगु धकाः नं मुँज्याय् सहमति जूगु दु । एकीकृत माओवादी नापं न्हय्गू ल्याः मंकाः गठबन्धनं संविधानसभाया संवैधानिक समितिया सकृय यायेमाःगु उच्च स्तरीय राजनीतिक कार्यदलया आवश्यकता मदये धुकल धकाः प्रस्ताव तःगु खःसा नेपाली कांग्रेस व एमालें धाःसा व हे कार्यदलयात म्याद थप यायेमाः धकाः अडान तयाः वयाच्वंगु खः ।
माओवादीया नायः पुष्पकमल दाहाल प्रचण्ड कजि जुयादीगु उगु कार्यदलया म्याद धाःसा वंगु मंसीर २५ गते हे फुइ धुंकूगु जूसां नं आः म्याद थप यायेगु ला कि मयायेगु धैगु विषयसं दलया नेतातय् दथुइ विवाद जुयाच्वंगु खःसा अन्ततः म्याद थप मयायेगु धकाः हे म्हिगः सहमति जूगु खः ।