अन्मिनया म्याद थप यायेगु माओवादीया प्रस्ताव

कांग्रेस-एमालेपाखें अस्वीकार

येँ (झीगु स्वनिगः)

एकीकृत नेकपा माओवादीं नेपाःया शान्ति प्रकि्रयाय् भूमिका म्हिता वयाच्वंगु संयुक्त राष्ट्र संघीय मिसन अन्मिनया म्याद थप यायेमाःगु प्रस्ताव स्वंगू दलया मुँज्याय् तःगु दु । सिहदरवारय् च्वंगु शान्ति मन्त्रालय्सं म्हिगः सोमवाः जूगु मुँज्याय् उगु कथं अन्मिनया म्याद थप यायेमाःगु प्रस्ताव एकीकृत माओवादीया नेतातय्सं तयादीगु खः । माओवादीं न्हूगु संविधान दयेकेगु ई जेष्ठ १४ गते तकया निति हे अन्मिनया म्याद थप यायेमाः धकाः स्वंगू दलया मुँज्याय् तःगु खः । उगु मुँज्याय् नेपाली कांग्रेस व नेकपा एमालेया नेतातय्सं धाःसा माओवादीया प्रस्तावयात अस्वीकार यानादीगु खः । अन्मिनया म्याद थ्व हे वइगु जनवरी १५ तक जक दिन । अनंलिपा म्याद थप मयात धाःसा अन्मिन लिहां वनेमालीगु अवस्था दु । सरकार व माओवादीया दथुइ तःक्वःमछि सहलह ब्याकाः वइगु माघ १ गते जनवारी १५ तक म्याद थप यानातःगु खःसा आः माघ १ गतेनिसें अन्मिनया म्याद फुइत्यंगु दु ।

माओवादीं शान्ति प्रकि्रया पूवंकेगु धकाः राजनीतिक दलतय्गु दथुइ सहमति जुइ धुंकूगु नापं आः अन्मिनयात लिछ्वल धाःसा शान्ति प्रकि्रयाय् लिच्वः लायेफूगु तायेकाः अथे संयुक्त राष्ट्रसंघीय मिसन अन्मिनया म्याद जेष्ठ १४ गते तक हे थप यायेमाः धकाः मुँज्याय् प्रस्ताव तःगु खः ।
शान्ति प्रकि्रया पूवंकेमाः धकाः ततःसलं हालेगु अले अन्तराष्ट्रिय रुपं हे नालातःगु राष्ट्रसंघीय मिसनया म्याद तकं थप मयायेगु गुगु कथं नेपाली कांग्रेस व एमालें कुतः यानाच्वन थुिकं यानाः उगु दलत गनं अन्मिनयात लितछ्वयाः भारतया चाहाना कथं भारतपाखें सुरक्षा निकायलय् तकं हस्तक्षेप याकेगु योजना दयेकाः नेपालय् ल्वापु तच्वयेकेगु अले माओवादीयात माइनस यायेगु षडयन्त्र यानाच्वंगु जकं मखुला धकाः मनूतयसं न्ह्यसः तयाहःगु दु ।