सहमति मालेत जबर्जस्ती जूगु सहमति

विपक्षी पार्टीं नियमित अधिवेशन सःति धकाः इनाप यातं नं सरकार माने मजुसेंलि सःतके बिउगु संसदया विशेष अधिवेशन शुरु जूगु दु। थ्व अधिवेशनं राजनीतिक दलतय् दथुइ विद्यमान तनाव म्हो यायेगु सिबें नं दुगु तनावयात अझ तब्या याना यंकीगु संकेत बिउगु दु। छाय्धाःसां प्रतिपक्षी माओवादी पार्टीया आह्वानय् सःतूगु विशेष अधिवेशनया एजेण्डा स्पष्ट मदुसा माओवादीं थ्व अधिवेशनय् पेश याइगु प्रस्तावत विफल याना बीगु धकाः सत्तारुढ पार्टीतय् गठबन्धन लगे जूगु दु। थुकिं सरकारय् दुथ्याःगु पार्टीत व विपक्षी माओवादी दथुया दूरीयात अझ तःधंका बीगु उलि हे सम्भावना दु। खतुं तःधना वनेत्यंगु तनावयात म्हो यायेगु ल्याखं थ्व विशेष अधिवेशनय् पेश यायेगु एजेण्डातय् बारे सहमति दयेकेगु धकाः राजनीतिक पार्टीतय् दथुइ सहमति जूगु दु। सहमति मालेगु लागिं सहमत जूगु बांलाःगु खँ ला खः तर गुगु ढंगं सहमति मालेगु ज्या जुल थुकिं थवंथवय् दुगु कटुता म्हो यायेगु ज्या धाःसा याइगु खने मदु। अधिवेशन सःते न्ह्यः हे बांलाक सहलह यानाः थज्याःगु सहमति माःगु खःसा उकिं लिपा थ्यंकं बांलाःगु वातावरण दयेका यंकीगु खइ। तर जबर्जस्ती व बाध्यतां जक सहमति दयेकेत तयार जुइगु रवैयां बने जूगु सहमतियात नं टिकाउ मयाइगु खँय् सतर्क जुइमाः। आः कमजोर प्रकृतियागु हे जूसां कुतः जूगु दु, उकियात ताःलाकेगु लागिं आः राजनीतिक पार्टी व उकिया नेतातय्सं कुतः यायेमाः। शुरुवात खराब जूसां अन्त्य बांलाक यायेफुसा उकियात नं सकारात्मक रुपं कायेमाली।नेतातय्सं आः कम से कम नं थुलि बुद्धि क्यना बिल धाःसा देय्या राजनीतिक खःगु दिशाय् वइगु खः लाकि?

More Stories Like this