स्वयम्भुया त्रयोदशभूमिइ-जि

प्रा.डा. बज्रराज शाक्य

पं. बद्रिरत्न बज्राचार्यया ज्याजंक्व (भीमरथारोहण) या लसताय् वसपोलयागु न्ह्य्न्हय्दँ, न्हय्ला, न्ह्यन्हुया गौरबशाली उपलब्धीपूर्ण संघर्षमय जीवन ह्वनेधुंकाः आः हाकनं न्हूगु उत्साहपूर्ण जीवन शुरु यायेगु थ्व लसताय् वसपोलयागु ताःआयु, भिं उसाँय् व आकांक्षापूर्ण जुइमा धकाः आशिका व प्रार्थना याना ।

वसपोलयागु आंकाक्षा धइगु जिं सिउकथं नेपालमण्डलयागु बज्रयानी बुद्धधर्म व नेपालय् प्रचलित बौद्ध संस्कृति संरक्षण यायेगु खः। वसपोलं थःगु दक्व शक्ति थुकिया लागि अर्पण यानाबिज्याःगु दु। वसपोल थौंकन्हय् दुपिं विद्वानपिंमध्ये नेपाःयागु बौद्ध धर्म व संस्कृति विषयस दक्वसिबय् अप्वः सःसिउम्ह ज्ञाता खः ।

बौद्ध धर्म संस्कृतिया संरक्षणया लागि वसपोलं अनेक उपाय, कौशल छ्यलाः वयाच्वनाबिज्याःगु दु। वसपोलं तःगूमछि संघसंस्थाया स्थापना यानाबिज्याःगु दु। थुलि जक मखु मेमेगु संघसंस्थातय्त नं सल्लाह बियाः, थीथी ज्याझ्वलय् ब्वति कयाः तिबः बीगु ज्या नं यानाबिज्याःगु खः। वसपोलं विशेष यानाः नेपालमण्डलयागु बौद्ध धर्म संस्कृति संरक्षणया लागि नीदँ न्ह्यवंनिसें थापना जुयाः येँ, यल, ख्वप, किपू, थिमि थेंज्याःगु थीथी थाय्यागु बौद्ध सम्पदायागु डिजिटल फोटो कयाः संरक्षण यानाः अन्तराष्ट्रिय सम्मेलनय् तःक्वःमछि यानाः, सम्बन्धित विषयय् विचार संकलन यानाः प्रचार प्रसार यानाच्वनाबिज्याःगु, नवग्रन्थयागु नेपालभाषां अनुवाद यायेगु थेंजाःगु थीथी कथंया ज्याखँ याना वयाच्वंगु संस्था लोटस रिसर्च सेन्टरयात सल्लाह, ग्वाहालि बिसें सहयोगी जुया वयाच्वनाबिज्याःगुलिं लोटस रिसर्च सेन्टरं वसपोलयात लुमंका वयाच्वंगु दु ।

वसपोलयात लुमंकाच्वंगु छगू मेगु नं विशेष कारण दु, व छु धाःसा नेपालय् सन् १९८६ स धर्मोदय सभाया ग्वसालय् जूगु डब्लुएफबी विश्व बौद्ध भ्रातृत्व संघया अन्तर्राष्ट्रिय बौद्ध सम्मेलनय् वसपोलयागु योगदान अद्वितीय खः। उबलय् रंगशालाय् सम्मेलनया उलेज्या जूबलय् लखंलख मनूत मुंगुया कारण वसपोल बद्रीरत्न बज्राचार्यजुया उपाय कौशल्य खः। जि सम्मेलनया सचिव व धर्मोदय सभाया उबलय्याम्ह महासचिव जूगुलिं जितः बांलाक लुमंगु खः। वसपोलं उबलय् 'नेपाःया बौद्ध धर्म (-buddhism of nepal) अंग्रेजी सफू च्वयाः भिक्षु अमृतानन्द महास्थवीरया विशेष सदिच्छाकथं आनन्दकुटी विहार गुथिं प्रकाशित जूगु खः ।

वसपोलं जितः विशेषकथं व्यक्तिगत रुपं दया, माया, करुणा तयाः बिज्यानाच्वंगु दु। बज्रयान धर्मया ज्याझ्वलय् जितः न्ह्याबलें सःता बिज्याइ। वसपोलयात छुं छुं खँय् आलोचना याये। वसपोलयाके थः प्रतिया आलोचना सह यायेगु उदारपूर्ण क्षमता खना जिं। वसपोलं जितः धर्मधातुया दीक्षा व मन्त्र प्रदान यानाबिज्याःगु खः। स्वयम्भू चैत्यय् लुं मोलम्बा याये सिधःगु लसताय् जूगु छवालं मयाकया विशेष पूजाया अन्तय् जूगु अहोरात्र महायज्ञया मू दिंकुन्हु वसपोलं च्वयाबिज्याःगु 'स्वयम्भूया त्रयोदश भुवन' नांयागु सफू पिथना ज्याय् जितः विमोचन यायेगु भाला बियाबिज्यात ।

थुज्वःगु सफूया जिगु ल्हाःतं विमोचन यायेगु ह्वःताः चूलाःगु धइगु वसपोल पं. गुरु बद्रीरत्न बज्राचार्यया असीमित कृपा जितः चूलाःगु हे खः। अबलय् वसपोल प्रति जिगु मिखां श्रद्धाया ख्वबि तिकिनंगु नं खः ।

बौद्ध धर्म संस्कृति प्रति वसपोलं यानाबिज्याःगु सम्पूर्ण त्याग, तपस्या व गतिविधिप्रति जि वसपोलप्रति नतमस्तक जुयाच्वनागु दु। वसपोलयात थौंया घडी नं श्रद्धाया भावस्वरुप थ्व निझ्वः आखःयात कियाः प्रकट यानाच्वना। वसपोलया जय जुइमा। सुभाय् ।

(च्वमि धर्मोदय सभाया सल्लाहकार खः। वय्कः धर्मोदय सभाया पुलांम्ह महासचिव खः। १५ क्वःगु विश्व बौद्ध सम्मेलन वय्कःया हे पालय् दशरथ रंगशालाय् जूगु खः।)

More Stories Like this