चिनियाँ प्रधानमन्त्रीपाखें पाकिस्तानी संसदय् सम्बोधन

इस्लामावाद (एएफपी)

पाकिस्तानया स्वन्हुया औपचारिक भ्रमणय् दीम्ह चिनियाँ प्रधानमन्त्री वेन जियाबाओं थःगु भ्रमणया लिपांगु दी आइतवाः पाकिस्तानया क्वय्या व च्वय्या संयुक्त निगुलि सदनय् ब्वति कयादीगु दु । अमेरिकी नेतृत्वय् अल - कायदा आतङ्ककारी विरुद्ध जुयाच्वंगु ल्वापुइ होमय् जूगु व गरिबीं आक्रान्त थुगु देशय् न्हापाया न्यादँ न्ह्यः चिनियाँ प्रधानमन्त्रीया थ्व न्हापांगु भ्रमण खः । पाकिस्तानया अस्वस्थ्य अर्थ व्यवस्था व उर्जा सङ्कटय् सुधार यायेत चीनं स्वीन्यागू अर्ब अमेरिकी डलर बराबरया वाणिज्य व लगानी सम्झौताय् ल्हाःचि तःगु दु । आणविक शक्ति सम्पन्न थुगु मुसलमानी राष्ट्रय् झिखुगू करोड न्हय्गू लाख जनसङ्ख्या दुगु व आन्तरिक मागया च्यय्गू प्रतिशततक्क आपूर्ति फयेफइकथं विद्युत उत्पादन यानाः वयाच्वंगु दु । उकिसनं तालिवानी आतङ्ककारीपाखें थाय्थासय्या विद्युत उत्पादन केन्द्रय् विस्फोट जुयाः वंगु स्वदँदुने उत्पादनय् तसकं क्षय जूगुलि देय् थप मारय् लाःगु खः । अथेहे थुगु दँया वर्षात्य् वंगु तच्वःगु चलः व पहिरोया कारण तःधंगु धनजनया क्षति जूवनाः देय्या अर्थतन्त्रय् हे व्यापक असर लाःगु खः । चीनया थुगु तःधंगु धनराशी लगानी सहयोगपाखें पाकिस्तानं सन् २०२५ तक्क च्याद्वः मेगावट विद्युत उत्पादन यायेगु योजनाया अतिरिक्त चीनया ग्वाहालिइ छगू गिगावाट आणविक उर्जा उत्पादन यायेगु लक्ष्य तःगु दु ।

More Stories Like this