थौंनिसें छ्यंगूया सामान प्रदर्शनी

येँ (झीगु स्वनिगः)

येँया राष्ट्रिय सभागृहय् थौं सोमबाःनिसें छ्यंगूया सामान प्रदर्शनी यायेत्यंगु दु । प्रदर्शनी छाला जुत्ता तथा बस्तु उत्पादक संघ नेपाःया ग्वसालय् जुइत्यंगु खः । उगु प्रदर्शनीइ नेपाली ब्राण्डया प्रयोग हे स्वदेशी उद्योगया सम्मान धइगु नारा ज्वनाः छवाःतक जुइत्यंगु खः । प्रदर्शनीइ ५० स्वयाः अप्वः स्टल दइगु छाला जुत्ता तथा बस्तु उत्पादन संघया नायः बिरमणी बज्राचार्यं जानकारी ब्यूगु दु । उपाभोक्तातय्त स्वदेशी उत्पादन छ्यलेगु निति अभिप्रेरित यायेगु साना उद्यमी व्यवसायीतय्त बजाः पहुँच बृद्धि यायेगु व लाकां उत्पादनय् देय्यात आत्मनिर्भर यायेगु आज्जु ज्वनाः उगु प्रदर्शनी जूगु बज्राचार्यया धापू खः । वय्कःयाकथं प्रदर्शनीं नेपाःया फुक्क नेपाःमितय्त नेपालय् उत्पादन जूगु लाकां थ्यंकेत ग्वाहालि जुइगु विश्वास प्वंकादिल । प्रतिस्पर्धी उद्यमीतय्गु उत्पादनयात स्वयाः मूल्याङ्कन याइगु अवसर नापं विइगु प्रदर्शनी उपलब्धिमूलक जुइगु संंघं धाःगु दु । थुकिया लिसलिसे संघं थ्व प्रदर्शनीयात बजाः विस्तार व विकास यायेत विक्रेतात नापं सहलह यायेगु व उकियात उपयोग नापं याइगु धाःगु दु ।

आःतक्क नेपालय् स्वंगू करोडया ल्याखय् लाकां रेगजिन इभा रबर कापः व चप्पलया माग जुइगु जूसां तिवं स्वदेशी उत्पादनया पीगू प्रतिशत जक आपूर्ति जुइगु यानाच्वंगु संघया धापू दु । संघया जानकारीकथं आःतक्क स्वदेशी उद्योगं छगू करोड न्यय्गू लख जोर लाकां उत्पादन यानाः वयाच्वंगु धाःगु दु । प्रदर्शनीइ शिखर शुज प्रा.लि. बेस फुड वेयर प्रा.लि. किरण शु म्यानुफ्याक्चर व सुरभी पोलिमरं प्रायोजन याःगु खः । संघं न्हापा खुदँ न्ह्योनिसें छ्यंगूया बस्तु प्रदर्शनी यानाः वयाच्वंगु व वंगु दँय् यायेमफूगु नं जानकारी वियादिल ।
प्रदर्शनीइ छगू लखं मल्याक मनूतय्गु ब्वति दइगु संघं धुकुमाः याःगु दु ।

More Stories Like this