अधिवेशनं प्रधानमन्त्री ल्ययेमाः

व्यवस्थापिकाया संसद म्हिगः निसें च्वन । सरकारय् च्वनाच्वंपि हरुवा व नालायकपिसं खुलं बजेट हयेत न्ह्याकाच्वंगु अधिवेशनया अन्त्य याःगु खः । देशया प्रधानमन्त्री ल्ययेगु प्रकृया न्ह्याना च्वंक च्वंकं काम चलाउ सरकारया आयू ताःहाकयेकेगु निहित स्वार्थया निति नियम विपरित सरकारं संसदया अन्त्य याःगु खः । माओवादी लगायत सरकारं पिनेच्वनाच्वंपि थीथी राजनीतिक दलतय्सं व्यवस्थापिका संसद सःतेत इनाप याःसां सत्ता त्वःतेगु कल्पनां हे थारा न्हूपि सरकारपक्षीय दलत मध्ये नेतृत्व यानावयागु एमालें सहमति मयायेकं सहमति मदयेकं संसद मसःतेगु जिद्दी यानाच्वंगु खः । सहमति मजूतले संसद हे मसःतेगु धायेगु एमालेया सत्ता मत्वःतेगु दाउ खःसा मेख्य् सत्तायात थः अबुया सम्पत्ति तायेकाः थःयत्थे छ्यलेगु व छययेकेगु मानसिकता खः । थ्व मानसिकतां नेपालय् अधिनायकवादया संकेट खः । सत्ताय् वलकि हानं मत्वःतेगु धयागु अधिनायकवाद खः । थ्वहे एमालेया अधिनायकवादयात तछ्यायेगु नियतं अले लोकतान्त्रिक मूल्य मान्यतायात निरन्तरता बीगु उदेश्यं व्यवस्थापिका संसद माओवादी लगायत थीथी दलतय्सं समावेदन दर्ता याकाः म्हिगः निसें अधिवेशन सतूगु खः ।

थुगु अधिवेशनयात नियमित अधिवेशन याकेत समावेदन लित कायेत सत्ताय् च्वनाच्वंपिसं इनाप नं याःगु खः । तर सभावेदन लित काइगुला खँहे जुइमखु । बरु संसद न्ह्याके धुंकाः नियमावली लगायत विषयलय् छु गुकथं न्ह्याः वनेगु धयागु खँय् छलफल जुइमाःगु खः । तर सत्तापक्षयापि थुखेपाखें मवंसे माओवादीयात लित कायेका नियमित संसदया रुपय् न्ह्यःनेवनेगु खँय् जिद्दि यानाच्वंगु दु । थ्व जक मखु थुकिया विरुद्ध सत्तापक्षयापि झिप्यंगू दलत दवयेगु धकाः गुगु ल्वापुया खँ पिकया च्वन उकि सकारात्मक लिच्वः पिहां वइगु खनेमदु । माओवादी सःतूगु विशेष अधिवेशनयात असफल यायेगु धयाः गुगु खँ पिकयाच्वन उकि संसदयात अलमलय् यायेगु वाहेक मेगु छुं जुइख्वा मवः । सहमति मजुइकं संसद सःतेमखु धाइपिसं छु सीके व थुइके माःधाःसा संसद धयागु राष्ट्रिय समस्यायात कयाः छलफल यानाः समाधान यायेगु थाय् खः । संसदया अन्त्य यानाः नं राष्ट्रिय राजनीतिक समस्यात ज्यनी नत प्रधानमन्त्रीहे ल्ययेफै । पहिला सहमति दयेकि अले संसद सःतेमाःसा सःते धायेगु अनुचित जक मखु सत्ता मत्वःतेगु व न्ह्यात्थे यानाः न समस्यायात यथावत तयातयेगु चाल जक खः । माओवादी लगायत सत्ता पिनेच्वंपि खुगू राजनैतिक दलतय्सं समावेदन दर्ता यानाः नियमावली नं हिलेगु प्रस्ताव न्ह्यःने हयेवं सत्तापक्षं थुकियात सकारात्मक मिखादुलि स्वयेगु पल्सा झिप्यंगू दलं माओवादीया प्रस्ताव असफल यायेगु धकाः गुगु अलमलय् यायेगु खँ हल उकि व्यवस्थापिका संसदयात छुं अलमलय् यायेगु थाय्कथं कयावयाच्वंगु स्पष्ट जुइ । आः लिच्वः पिहां मवइगु प्रमया ल्यज्याय् पाखे मवंसे नियम संशोधन यानाः छम्ह प्रधानमन्त्री ल्ययेहेमाः । कांग्रेसया याक उम्मेदवार रामचन्द्र पौडेलं ना लित कयाः न्हूगु हे प्रकृयां न्ह्याः वनेगु स्वयेमाः । एमालें नं तटस्थता लँपुं त्वःताः न्हूगु प्रकृयाय् दुहांवयेमाः । संसदया गरिमायात थुगु कथंजक बचय् यायेफै । थ्वहे लोकतन्त्रया सही लँपु खः ।

More Stories Like this