किपू महोत्सव नेवाःलहनाय् सिमित जुइगु

किपू (झीगु स्वनिगः)

किपू महोत्सव यायेगु धकाः तयारी यानाच्वंगु विषययात कयाः नेवाः स्वायत्त राज्य मंकाः परिषद् किपूपाखें सरोकार क्यनाः ग्वसाः खलःया कजि व किपूया बुद्धिजीवीतय्गु दथुइ शनिवाः छगू सहलह ज्याझ्वः यात । उगु सहलह ज्याझ्वलय् परिषद्या सल्लाहकार डा. शिवशरण महर्जनं किपू महोत्सव धकाः समग्र किपूमितय्गु महोत्सव यायेमाः धकाः बहः बियादीगु खः । अथे हे बुद्धिजीवी डा. चन्द्रमान बज्राचार्यं किपू महोत्सव धकाः व्यक्तिगत लवः कायेत जक यायेमजिउ धयादिसें मिसा पुचःतय्त न्ह्यःनेलाःथे प्रयोग यानाच्वन धकाः धयादिल । वय्कलं किपू महोत्सव धकाः किपुलिइ गन गन छु छु जुइ धकाः व्यक्तिगत रुपं जक धयाजूगु बांलाःमजू धयादिसें सकलसित समन्वय यानाः जक यायेमाः धकाः बहः बियादीगु खः । परिषद्या नायः पुचःया दुजः कृष्णहरी महर्जनं नं किपूया हे भाव पिब्वइगु कथं जक किपू महोत्सव यायेमाः धयादीगु खः । परिषदया दुजः कृष्णमान डंगोलं आः किपू महोत्सव यायेत्यंगुया आर्थिक स्रोत पारदर्शी मजू धकाः धयादिल । अथे हे नेवाः स्वायत्त राज्य मंकाः परिषदया नायः पुचःया कजि पंचलाल महर्जनं किपू महोत्सव धायेबलय् नगां पांगा च्वबाहाः इताग्वः क्वार नापं फुक्क लागात कःघानाः किपूया हे महोत्सव कथं यायेमाः धकाः बहः बियादिसें मंकाः परिषदया याकनं हे मुँज्या च्वनाः 'किपू महोत्सव'या आधिकारीक धारणा पितबिइगु जुइ धयादिल ।

अन वःगु न्ह्यसःया लिसः बिइगु झ्वलय् ग्वसाः खलःया कजि राजमान महर्जनं आःया अवस्थाय् नेवाः लहनापाखें खर्च यानाच्वनागु खः धयादिसें किपूया त्वाः त्वालय् क्यनेगु धयातयागु नेवाःतय्गु संस्कृति संस्कारत क्यने मफत धाःसा नेवाः लहना थांबहालय् जक जूसां महोत्सव यायेगु नापं व्यापारिक प्रदर्शन जकसां यायेगु जुइ धकाः धयादीगु खः ।