नेविसंघपाखें आक्रमण
येँ (झीगु स्वनिगः)
नेपाली कांग्रेसया भ्रातृ संगठन नेपाल विद्यार्थी संघया कार्यकर्तातय्सं म्हिगः आइतवाः अखिल क्रान्तिकारी व एमाले अखिलया कार्यकर्तातय्त आक्रमण यानाः घाःपाः यानाब्यूगु दु । नेपालटारया ग्रामीण आदर्श बहुमुखी क्याम्पसय् अखिल क्रा. व नेविसंघ दथुइ ल्वापु जूगु दु । ल्वापुइ क्रान्तिकारीया येँ जिल्ला सचिवालय दुजः सम्पूर्ण अधिकारी प्रकाश डंगोल लगायत स्वम्हसित घाःपाः यानाब्यूगु खः । सुथय् ९ ताः इलंनिसें सामान्य विवाद जुइवं नेविसंघं आक्रमण याःगु अखिल क्रा.या येँ जिल्ला नायः केदार खतिवडां जानकारी ब्यूगु दु । ल्वापुलिपा प्रहरी अझ अखिल क्रान्तिकारीया घाःपाः जूपि कार्यकर्ता लगायत खुम्हेसित ज्वनाः बालाजुया प्रहरी चौकीइ तयातःगु धासें विरोध याःगु दु ।
अथेहे त्रिचन्द्र कलेजय् नं नेविसंघया कार्यकर्तातय्सं एमाले अखिलया वीरेन्द्र रावलयात खुकुरीं पालाः घाःपाः यानाब्यूगु दु । घाःपाः जूम्ह रावलयात मोडल अस्पतालय् वासः यायेगु ज्या जुयाच्वंगु दु ।
