संसदया विशेष अधिवेशन न्ह्यात

विहीवाः तक सहमतिया कुतः

येँ (झीगु स्वनिगः)

एकीकृत नेकपा माओवादी व न्हय्गू दलया गठबन्धन जानाः मुक्कं यानाः च्यागू दलया सांसदतय्सं तयादीगु समावेदनयात कयाः आह्वान याःगु व्यवस्थापिका संसदया विशेष अधिवेशन म्हिगः आइतवाःनिसें न्ह्याःगु दु । म्हिगः न्हूबानेश्वरया संविधानसभाया भवनय् जूगु विशेष अधिवेशनया न्हापांगु दिनय् राष्ट्रपति डा. रामवरण यादवं छ्वयाहःगु पौ ब्वनाः सभामुख सुवास चन्द्र नेम्वाङं न्यंकादीगु खः । माओवादी व न्हय्गू दलया गठबन्धनं आःया अवस्थाय् प्रधानमन्त्री उम्मेदवारीया औचित्य समाप्त जुइ धुंकूगु जुयाः आः संसदया निर्वाचन सम्वन्धि नियमावली संशोधन यानाः न्हूगु हे प्रकि्रया कथं प्रधानमन्त्री ल्ययेगु ज्या न्ह्याकेमाः धकाः प्रस्ताव तयातःगु दु । व्यवस्थापिका संसदया म्हिगःया मुँज्याय् सभामुख नेम्वाङं माओवादी नापं मेमेगु दलतय्सं पेश याःगु प्रस्तावयात कयाः सहलह ब्याकेगु निति विहिवाः व शुक्रवाः निन्हुया ई क्वःछिनादीगु दु । उगु कथंया प्रस्तावय् संशोधन यायेगु निति जूसा वइगु बुधवाः तकया ई धकाः नं वय्कलं घोषणा यानादीगु दु ।

अथे व्यवस्थापिका संसदया मुँज्या च्वने न्ह्यः संसदया कार्यव्यवस्था नापं परामर्श समतिया मुँज्या च्वंगु खः । उगु मुँज्यां म्हिगः आइतवाःया व्यवस्थापिका संसदया मुँज्यायात औपचारिकता जक बिइगु नापं राष्ट्रपतिया पौ ब्वनाः न्यंकाः मेगु मुँज्याया तिथि घोषणा यायेगु धकाः सहमति जूगु खः । अथे समितिइ जूगु सहमति कथं हे संसदया मुँज्या न्ह्याःगु खः । उगु हे कथं अथे संसदया कार्यव्यवस्था परामर्श समितिया मुँज्या च्वने न्ह्यः एकीकृत माओवादी नेपाली कांग्रेस व एमालेया शीर्ष नेतातय्गु दथुइ सिहदरवारय् मुँज्या जूगु खः । उगु मुँज्याय् सहमतिया निति वइगु पुस ८ गते तक कुतः यायेगु नापं अनंलिपा नं सहमति मजुल धाःसा संसदय् प्रस्तावयात कयाः चुनावय् वनेगु धकाः खँ जूगु खः ।

शीर्ष नेतातय्गु दथुइ जूगु सहमति कथं आः स्वंगू दलया नेतातय् दगुइ वइगु विहिवाः तक सहमतिया निति कुतः याइगु जूगु दु ।

उगु मुँज्याय् एमाले व नेपाली कांग्रेसं संसदया विशेष अधिवेशनयात लित कायेत माओवादीयात इनाप याःगु खःसा माओवादीं उकियात अस्वीकार याःगु खः । अथे हे माओवादी व एमाले जानाः कांग्रेसयात प्रधानमन्त्रीया उम्मेदवारी लितकायेत प्रस्ताव तःगु खःसा कांग्रेसं उकियात अस्वीकार याःगु खः ।