राप्रपाया सलंसः कार्यकर्तात ज्वन
चक्काजामया प्रभाव न्यून
येँ (सन्ध्या टाइम्स)/नेपाल आयल नियमं पेट्रोलियम पदार्थया भाः थकाःगु विरोधय् राष्ट्रिय प्रजातन्त्र पार्टी नेपालया कार्यकर्तात थौं सुथय् स्वनिगःया थीथी थासय् निघौ तक चक्काजाम यायेत सतकय् कुहां वःगु इलय् प्रहरीं थाय्थासं सलंसःम्हेसित ज्वनायंकूगु दु ।
स्वनिगःन्यंकं धाःसां खास यानाः चक्रपथ लागाया मुख्य मुख्य झिंखुगू नाका व चक्रपथ दुनेया स्वीनिगू उपनाका ब्वथलाः अनं वये-वने मदइगु कथं चक्काजाम यायेगु ग्वसाः ग्वयातःगु खःसां प्रहरीं ग्वंगःबुँ लागां ८ म्ह, ख्वपया सल्लाघारीं ३० म्ह, बालाजुं १० म्ह बानेश्वरं २२ म्ह, रत्नपार्कं १९ म्ह, गौशालां ४० म्ह, अथे हे चाबहि, लैनचौर नापं थाय्थासं यानाः सलंसः कार्यकर्तात ज्वनायंकूगु दु धकाः राप्रपा नेपालया सहमहामन्त्री राजाराम श्रेष्ठं कनादीगु दु। चक्का जाम आह्वान याःगु नापं कार्यकर्तातय्त प्रहरीं ज्वनायंकूगुलिं चक्काजामया न्यून प्रभाव लाःगु खः ।
छुं ई न्ह्यः आयल निगमं जा थुइगु एलपी ग्यासय् प्रति सिलिण्डर ७५/- तका व मचिकं, पेट्रोल व डिजेलया भावय् प्रति लिटर स्वतका दां थकायेवं राप्रपा नेपालं क्रमवद्ध रुपं आन्दोलन यानावयाच्वंगु दु ।
सुथय् ९ बजेनिसें ११ बजे तक राप्रपा नेपालं थनया कलंकी, बालाजु, चाबही, कोटेश्वर व सातदोबाटो लागाय् जक न्याद्वलं मल्याक कार्यकर्ता परिचालन यानाः चक्काजाम यानागु दावी याःगु दु। चक्काजामं यानाः स्वनिगःया यातायात छझाः ठप्प जूवंगु खः। थुगु ज्याझ्वः लिपा नं यदि सरकारं थःपिनि मागयात बेवास्ता यात धाःसा राप्रपा नेपालं नेपाल बन्द तकया ज्याझ्वः यानाः सरकारयात दबाब बीगु ख्याच्वः बिउगु दु ।
नेता श्रेष्ठं थौं बहनी तकया दुने न्हूगु चरणया संघर्षया ज्याझ्वः पित बीगु जुइ धकाः नं कनादीगु दु ।
