पारस कारवाहीपाखें पिहां वःगु थीथी न्ह्यसः

पुलांम्ह युवराज पारस शाहं गोली चले याःगु काण्डयात कयाः जुयाच्वंगु कारवाही प्रक्रिया धाथें नं अजूचायापुगु मोडं न्ह्याः वनाच्वंगु दु। थ्व इलय् प्रहरी हिरासतय् लानाच्वंम्ह पारस शाह छम्ह अभियुक्त खः, सुं विशिष्ट व्यक्ति मखु। तर प्रहरीं वय्कःयात अभियुक्त सिबें नं राजपरिवारया दुजः थें हे व्यवहार यानाः कारवाही न्ह्याकाच्वंगु दु। अले थ्व कारवाही गुगु न्ह्यानाच्वंगु खः, थ्व नं छगू नियमित प्रक्रियां सिबें नं नेपाली कांग्रेस व उकिया नेतातय् दवावं यानाः जक न्ह्यःने न्ह्यानाच्वंगु सीदु। थौं कांग्रेस नेताया छम्ह थःथितियात थज्याःगु घटना जुइसातकि पूरा कांग्रेस पार्टी हे अपराधीयात कारवाही यायेमाः धकाः गुकथं न्ह्यःने वःगु खः, न्हापा थ्वहे पारस शाहं मेपिं सर्वसाधारण मनूयात अत्याचार याःबलय् कांग्रेसया थ्व नेतात गन वनाच्वन धइगु न्ह्यसः नं थ्व इलय् पिहां वयाच्वंगु दु। आः पारसं पेस्तोल क्यन धाःम्ह मनू नं छम्ह विदेशी खः, तर व नेपाःया शक्तिशाली मनूयात थःथिति जूगु कारणं थुकिं मेगु मोड कयाच्वंगु दु। तर खँ न्ह्यागु हे जूसां पुलांम्ह युवराज पारस शाहयात कारवाही न्ह्याकेगु प्रक्रिया शुरु जुल, उकियात धाःसा सकारात्मक हे कथं कायेमाः ।

बरु पारसया थ्व गिरफ्तारी सतकय् वयाः नाराबाजी यानाच्वंपिं जुजुवादीतय् लागिं समाजय् अराजकता ब्वलंकेगु बांलाःगु अवसर जुया बीफु। थुकी धाःसा बिचाः यायेमाः। पारसयात त्वःतेमाः धइगु नारा बियाः वयाच्वंपिं थ्व मनूतय्सं तोडफोड आदि यानाः अराजकता ब्वलंकेगु व देशय् अस्थिरता सिर्जना यायेगु ज्या यायेफु। उकी राज्य गम्भीर जुइमाः लिसें मेगु राजनीतिक शक्तित नं सचेत जुइमाः ।

More Stories Like this