जनमतया अःख मार्क जुकर्बर्ग टाइम पर्सन अफ द इयर २०१०

- अनीश मल्ल

विश्वन्यंकया मनूतय् अनुमानयात गलत साबित जक मखसें जनमतया हे अःख अमेरिकां पिहांवइगु टाइम म्यागजिनं थुगु दँया ‘टाइम पर्सन अफ द इयर’या उपाधि सामाजिक संजाल फेसबुकया प्रमुख नापं सह-संस्थापक मार्क जुकर्बर्गयात ब्यूगु दु । जनमत कथं विकिलिक्सया संस्थापक जुलियन असान्ज न्हापांगु थासय् लाःगु खःसां टाइमं झिगूगु थासय् दुम्ह जुकर्बर्गयात थुगु उपाधि बीगु निर्णय याःगु खः ।

दँय्दसं टाइम म्यागजिनं दच्छि दुने सकारात्मक वा नकारात्मक ज्या यानाः हलिंन्यंक थःगु प्रभाव लाकेत ताः लाम्ह मनू वा संस्थायात ‘टाइम पर्सन अफ द इयर’या उपाधि बीगु यानाच्वंगु खः । दँय्दसं थें थुगुसी थुगु उपाधि सुनां त्याकी धइगु उत्सुक्ता ब्वलनाच्वंगु खः ।

थुगु उपाधिया हकदार ल्ययेगु निंतिं टाइमया वेबसाइटं जनमत नं मुंकूगु खः । जनमतया निंतिं २५म्हेसिया नां दुथ्याकातःगु खः । म्हिग तक जनमतय् विकिलिक्सया प्रधान सम्पादक नापं संस्थापक जुलियन असान्ज न्हापांगु थासय्, टर्कीया राष्ट्रपतिजिप ताज्जिप एर्डोन निगूगु व स्वंगूगु थासय् नांजाम्ह म्ये हालामि लेडी गागा दुगु खःसा जुकर्बर्ग धाःसा झिगूगु थासय् जक दुगु खः । जनमतयात स्वयेगु खःसा असान्जया न्ह्यने जुकर्वर्गया भोट तसंक म्हो जक दुगु खः । तर अथे खःसां टाइमं जुकर्वर्गयात ‘टाइम पर्सन अफ द इयर’या उपाधि ब्यूगु दु ।

जनमतया कदर मयासें याःगु थुगु निर्णय लिपाः टाइस म्यागजिनं दँय्दसं बियावयाच्वंगु थुगु उपाधिलय् हे न्ह्यसः ब्वलंगु दु ।

More Stories Like this