बयानय् पारसं छु धाल?
पारसयात मेगु स्वन्हु कुनेगु अनुमति
येँ (सन्ध्या टाइम्स)/पुलांम्ह युवराज पारस शाहं भरतपुरया प्रहरी चौकीइ बयान बीगु झ्वलय् थम्हं सुजाता कोइरालाया जिलाजं रुबेल चौधरीयात तंया झोंकय् जक गोलीं कयेकागु खः, स्यायेगु नियतं गोली चले यानागु मखु धयादीगु दु ।
सूत्रं बिउगु जानकारी कथं बयानया झ्वलय् वय्कलं 'थ्वया ससःबाज्यां देश बर्बाद याःगु खः। नेपालय् दयेकातःगु फुक्क हे बांबांलाःगु कारखानात विदेशीतय्त कौडीया भावं मिया छ्वल, राजनीतिइ नं विदेशीतय्त हावी यात, जुजुं जुजुं आः वयाः जिलाजं तकं विदेशी हे दयेकल, उकिं तं सहः याये मफयाः जिं फसय् गोली चले यानागु खः' धयादीगु खः। वय्कलं तं पिहां वयाः जक पेस्तोल क्यनागु खः, स्यायेगु नियत मखु धकाः नं बयानय् धयादीगु खँ सूत्रं धाःगु दु ।
वय्कःयात भरतपुर तालिम केन्द्र दुने केन्द्रया प्रमुख (एसपी) बलराम शर्मां बयान काःगु खः। एसपी बलराम शर्मा प्रधानमन्त्री माधव नेपालया साढुभाई खः। बयानया इलय् पारसया जिलाजं डा. राजीव शाह, कांग्रेसपाखें वःम्ह वकिल गणेश केसी व सरकारी वकिल नं दुगु खः।
बयानया इलय् थ्व काण्ड बारे छानबिन यायेत गठन याःगु समितिया प्रमुख गंगा पन्त नं छकू कुनाय् च्वनाः बयान फुक्क ल्याबटबय् नोट यानाच्वंगु जुयाच्वन। छगू हे बयान निथाय् नोट यात धकाः पारसं गंगा पन्तयात विरोध नं याःगु खः। तर पन्तं थ्व बयान थःत लिपा लिपा नं ज्या लगे जुइ धकाः टिपे यानाच्वनागु खः धकाः लिसः बियाः पन्छे जुल ।
बयान चान्हसिया १२.३० बजे तिनि क्वचाःगु खः। बयानया हे झ्वलय् जा नयेत तालिम केन्द्रं पिनें खाना झिके याःगु खः। उकी जा, केँ, खायागु ला व न्या नं तयाहःगु खः। तर पारसं थः नुगःचुया ल्वगि जूगु कारणं न्या नये मखु धकाः नयामदी। बयान लिपा वय्कःयात द्यनेत हानं चितवनया टाइगर टप्स रिसोर्टय् हे यंकूगु खः। थौं चितवनया सीडीओं पारसयात मेगु स्वन्हु हिरासतय् तयेगु अनुमति बिउगु दु ।
सुजाताया जिलाजंयाके नं बयान
पुलांम्ह युवराज पारस शाहं गोली चले याःगु काण्डया पीडित पात्र भाजु रुबेल चौधरीयाके नं थौं प्रहरीं बयान काःगु दु ।
चौधरीयात नं बयानया लागिं भरतपुर यंकेगु खँ जूगु खःसां वय्कलं भरतपुर वने मखु धाःगुलिं थौं येँ महाराजगंजया प्रहरी ज्याकुथी तुं सःताः बयान काःगु खः ।
बंगलादेशया नागरिक चौधरी बंगलादेशय् राजनीतिक रुपं नं प्रभाव दुम्ह जूगुलिं वय्कःया थ्व प्रकरणय् बंगलादेशपाखे नं नेपाःयात दवाव वयाच्वंगु खँ धाःगु दु ।
