उच्चस्तरीय कार्यदल आवश्यक दनि
संविधान दयेकेगु ज्याय् वयाच्वंगु पंगः चीकेगु ताः तयाः २७ दल जानाः दयेकूगु उच्चस्तरीय राजनीतिक कार्यदलया म्याद थपे यायेगु खँय् विवाद पिहां वयेवं आः थ्व कार्यदल हे आवश्यक खः लाकि मखु धइगु न्ह्यसः समेत पिदंगु दु। कार्यदलया म्याद थ्वहे वालय् थपे यायेमाःगु खःसां माओवादी दुने उगु कार्यदलयात कयाः ब्वलंगु विवादं यानाः म्याद थप जुइ मफुत। थुकिया नापनापं संवैधानिक समितिया अध्यक्ष निलाम्बर आचार्यं थज्याःगु कार्यदलया औचित्य मदु धासें थुकियात भंग हे याना छ्वयेमाःगु बिचाः नापं न्ह्यःने तयादीगु दु। थुपिं थीथी कारणं यानाः आः कार्यदल धाथें भंग यायेमालीगु खः लाकि धइगु आशंका समेत थन पिहां वःगु दु ।
खतुं संविधान निर्माणया ज्या यायेगु थाय् संविधानसभा खः। तर संविधानसभां थ्व इलय् संविधान च्वयेगु ज्या न्ह्याके फयाच्वंगु अवस्था मदु। थीथी सैद्धान्तिक न्ह्यसःया कारणं संविधान च्वज्या न्ह्याये फयाच्वंगु मदु। संविधानसभां ज्यंके मफुगु न्ह्यसःत ज्यंकेत राजनीतिक पार्टीत छथाय् च्वनाः सहलह यायेमाःगु अतिकं आवश्यक दु। थ्व कार्यदलया ज्या धइगु वास्तवय् राजनीतिक पार्टीत छथाय् च्वनाः संविधानया समस्या बारे छलफल यायेगु जक खः। थुकियात औपचारिक मान्यता बीमाःगु मदु । तर संविधान दयेकेगु लागिं थ्व मयासें मगाःगु ज्या धाःसा खः। थ्वं याःगु निर्णय सही खः लाकि गलत खः, उकिया बारे थःथःगु प्रतिक्रिया बीगु ला द हे दनि। तर संविधानसभां निदँ तक नं समाधान याये मफुगु समस्यात थ्वं निलां समाधान याःगुलिं थुकिया आवश्यकतायात नकारे याये मछिं ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
