पांगा व नगांया ब्यागलं ब्यागलं जात्रा

थौं पांगाया विष्णुदेवी व वालकुमारीया जात्रा

श्रीकृष्ण महर्जन

स्वनिगःया थीथी नेवाः वस्तीत मध्ये छगू महत्वपूर्णगु बस्ती पांगा । किपू नगरपालिका दुने लानाच्वंगु पांगाया थःगु हे कथंया ऐतिहासिक व सांस्कृति पक्षत दु । पांगा नेवाःतय्गु बस्ती खःसा पांगाया दक्ले महत्वपूर्णगु लागा कथं लाछि यात नालातःगु दु । लाछिइ नासःद्यःया द्यःछेँ दुसा अन दबू नापं फल्चा व नारायण द्यःया देगः नं दु । पेगोडा सैलीया नारांद्यःया देगः लागाय् देय् पुखू नं दु । देय् पुखुलिइ पांगाय् सापारुखुन्हु म्येय्या छ्यं बिइगु नापं त्वान्नाः बिइगु चलन दु । पांगा देय्या दकले महत्वपूर्णगु पुखू जूगिलं हे जुइमाः उगु पुखूयात देय् पुखू धकाः धयाच्वंगु । लाछि लागाय् मल्लकालीन शैलीं देगः द्यःछेँ नापं फल्चा दयेकातःगु दु । पांगा देशय् दक्ले चकंगु नापं आकर्षक थाय् कथं लाछि लागायात हे नालाः कायेत बाध्य यानाब्यूगु दु । लाछिइ द्यःछेँ नं दु । पांगाय् दँय् दसं थिलाथ्व नवःमि खुन्हु विष्णुदेवी व वालकुमारी द्यःया जात्रा न्यायेकीगु चलन दु । पांगाया जात्राया झ्वलय् सप्तमियात छ्वय्लाभू अष्टमियात मूयाः अले नवःमियात सिन्हःयाः धकाः द्यःखः क्वबिया जात्रा याइगु चलन दु । पांगामितय्गु दकले तःधंगु नखः कथं नालातःगु जात्रा थौं पांगाया जात्रा खः । अर्थात विष्णुदेवी व वालकुमारीया जात्रा खः । पीठ गण अर्थात पीगंद्यःया गंछि द्यःया मूर्ति तयाः जात्रा याइगु जूसां नं मूल द्यः कथं विष्णुदेवी व वालकुमारीयात नालाः याइगु जात्रा जुयाः हे पांगाया जात्रायात विष्णुदेवी बालकुमारी जात्रा धायेगु नं याना वयाच्वंगु खः । जात्राया झ्वलय् अष्टमिखुन्हु बहनी पांगाया लाछि त्वालं विष्णुदेवीया मूल द्यः नालातःगु द्यःखः क्वबिया पीगनय् यंकीगु खःसा अथे हे बालकुमारी द्यःयात मूल द्यः नालातःगु द्यःखः क्वबियाः बालकुमारीया देगः दुगु लागा दीख्यलय् यंकेगु याइ । अनंलिपा भाजंगाः लागाया उगु पीगनय् चान्हय् ह्वंकिला वनीगु चलन दु । ह्वंकिला वनीगु धैगु होम याःवनीगु खः । अथे ह्वंकिला वनेधुंकाः द्यःखः क्वबिया हयाः पांगाया ध्वाखासि त्वाःया भच्चा क्वय् द्यःचपाःया द्यःफल्चा लागाय् तइ । अन हे बालकुमारी द्यःखः नं क्वबियाः हइ ।

अथे बालकुमारी क्वबिया हइगु चान्हय् जुयाः सुनां नं मसिइक यंकेगु नं धाइ । अन द्यःचपाः लागाय् पुजा याये धुंकाः द्वारे पूजा वनी । अनंलिपा सांस्कृतिक बाजं थानाः जात्रा यानाः पांगा देसय्पाखे जात्रा दुत हइ । बालकुमारीया द्यःखः न्ह्यःन्ह्यः विष्णुदेवीया द्यःखः ल्यूल्यू तयाः जात्रा याना हइ । जात्रया झ्वलय् पांगाया ध्वाखासिइ थ्यनेवं विशेष कथं पुजा याइ । अनंलिपा जात्रा यानाः पांगा देसय् चाःहिकी । जात्रा चाःहिइके क्वचाये धुनेवं पांगाया लाछिइ हे यंकाः द्यः दुकयाः जात्रा क्वचायेकेगु चलन दु । काहां धिमेनिसें नेवाःतय्गु थीथी कथंया सांस्कृतिक बाजा पुयाः व थानाः याइगु पांगाया जात्राया झ्वलय् नइगु नँसा धैगु तःखाः खः । चिकुलाया ई जुयाः हे अथे तःखाः दायेकाः नयेगु यानाः वयाच्वंगु खयेमाः । पांगामितय्सं जात्राया इलय् थःथितित सःतेगु अर्थात नखत्या सःतेगु याइसा अथे पाहांपिन्त व हे तःखाः तयाः भ्वय् नकेगु याइ । पांगाया जात्रा नापं वस्तीयात स्वयेबलय् उगु जात्रा नापं बस्ती नं मल्ल कालय् हे जूगु खयेमाः धकाः अःपुक अनुमान यायेछि ।

More Stories Like this